O grupo municipal socialista de Mos, diante da nova sentencia, esta vez do Tribunal Superior de Xustiza de Galicia, que "confirma as ilegalidades urbanísticas perpetradas na execución da Cidade Deportiva do Celta e diante do anuncio do Concello de Mos de que seguirá coa súa fuxida cara adiante presentando un novo recurso de casación diante do Tribunal Supremo", esíxelle á alcaldesa que "deixe de utilizar o diñeiro público de tódalas veciñas e veciños e se pague esta nova frivolidade xudicial do seu peto". "Todo isto responde a un asunto personalísimo do señor Mouriño e a señora Arévalo, coa complicidade da Xunta de Galicia; un asunto que nada ten que ver cos intereses xerais de Mos e que en nada beneficia á veciñanza, así que correspóndelle á alcaldesa responder co seu patrimonio".

A voceira socialista en Mos, Victoria Alonso, considera escandaloso que o TSXG volva confirmar a evidencia de que en Mos perpetrouse un "ti vai facendo" en toda regra. O alto tribunal galego volve confirmar que o Concello de Mos infrinxiu a lexislación urbanística ao evitar a aprobación previa dun Plan Especial de Estruturas e Dotacións antes de aprobar as licenzas para as sucesivas obras que o Celta xa foi executando nos montes comunais. "Se fose un particular, xa estarían preparando o expediente de derrubo", afirma. "O señor Mouriño puido así comezar unhas obras que, doutro xeito, terían que ter agardado ata a aprobación do Plan Especial, previa emisión dos informes sectoriais das distintas Administracións e organismos involucrados e a día de hoxe non podería aínda ter comezado". "Todo isto foi unha manobra orquestrada para esquivala lexislación", engade.