O director xeral de Comercio e Consumo, Manuel Heredia, participou  na presentación da nova edición de verán da campaña Días Azuis do Comercio Galego, organizada pola Xunta de Galicia e a Federación Galega de Comercio; coa colaboración de Abanca, así como das federacións provincias de comercio, asociacións de comerciantes e centros comerciais abertos de toda Galicia.

Trátase da novena edición desta coñecida iniciativa comercial, que contará este ano con outra convocatoria no mes de novembro. O obxectivo é impulsar e visibilizar o comercio de proximidade galego; poñendo en valor o seu importante papel económico e social e contribuír á súa dinamización e reactivación.

Para participar nesta campaña, que se desenvolverá entre o 23 de xuño e o 17 de xullo, os clientes dos comercios que realicen as súas compras entre estas datas deberán rexistrar o seu tícket en www.diasazuis.com, ou ben solicitar que as rexistre o propio comerciante.

 

Durante este período, as persoas que merquen no pequeno comercio entrarán no sorteo de 64 tarxetas prepago de 150 e 250 euros para comprar en establecementos de proximidade

 

Entre todos os participantes sortearanse un total de 12.000 euros en 64 tarxetas prepago: 24 tarxetas de 250 euros (6 por provincia) e 40 tarxetas de 150 euros (10 por provincia), que deberán ser empregadas para volver mercar nos establecementos de proximidade ata o 30 de xuño do próximo ano. O sorteo realizarase ante notario o 21 de xullo.

Os gañadores dos premios serán contactados pola Federación Galega de Comercio para informarlles do premio obtido e cando será entregado. Así mesmo, publicaranse na páxina web unha vez finalizada a campaña.