Coa aprobación do convenio con Asime  (Asociación de Industrias do Metal e Tecnoloxías Asociadas), a Deputación de Pontevedra pon en marcha o pioneiro proxecto “Tecnolóxicas”, coa que busca  situar á provincia e a Galicia en xeral na vangarda da loita contra a fenda de xénero no sector tecnolóxico-industrial. Xerar unha cultura do talento feminino tecnolóxico para enriquecer o tecido industrial,  así como dar visibilidade e información para atraer ás mozas ás carreiras STEAM e darlles resposta real ás necesidades actuais das empresas da provincia son os principais obxectivos desta iniciativa. Nesta primeira edición, “Tecnolóxicas” desenvolverase ata o 2023 e conta cun orzamento que supera os 200.000 euros, dos que a institución provincial achegará 135.728.

“Non podemos esquecer que hai moita xeración de emprego, e de calidade, no ámbito da tecnoloxía e estamos a ter un serio problema”, alertou a presidenta Carmela Silva. “Os datos de matriculación das mulleres nas STEAM, nas carreiras de Enxeñería, Ciencias, Matemáticas, en lugar de medrar, caen. Soamente somos o 6% das persoas en estudos TIC, o 14% en FP de Informática ou o 13% das persoas graduadas en STEAM. Estes datos téñenos que poñer en alerta, porque están e van ocasionar que as mulleres esteamos excluídas da posibilidade de ser lideresas do sector tecnolóxico. Por iso, dende a Deputación, queremos dar un paso cara adiante para modificar esta realidade”. A presidenta destacou que unhas 600 empresas están adheridas a ASIME, polo que se trata dun convenio de gran alcance.

 “Tecnolóxicas” (https://tecnoloxicas.com/), que optará aos fondos Next Generation como programa de igualdade,  busca ofrecer ás mulleres tecnólogas a formación e contratos nas empresas do sector para visibilizar o seu rol e fomentar deste xeito futuras vocacións STEAM. Arrancará este 2022 como proxecto piloto coa participación de  10 mulleres e 10 empresas. Está baseado en tres piares: a formación, o mentoring e a sensibilización. No primeiro eido, as rapazas seleccionadas recibirán cursos gratuítos acorde á demanda do propio sector empresarial e tamén se ofrecerán 10 contratos en empresas cunha duración de 6 meses para a posta en práctica da formación adquirida, facilitando o acceso a empregos técnicos demandados polo sector. As empresas que reciban alumnas accederán a un Selo de Igualdade de Talento na Tecnoloxía.

No que atinxe ás actividades de mentorización, as dez participantes serán tuteladas durante 8 meses por profesionais femininas con perfís técnicos e directivos do sector, cunha titorización personalizada para orientación técnica, contacto coas empresas candidatas, orientación á formación, creación dun itinerario laboral e acompañamento. Por último, no apartado de sensibilización búscase xerar referentes locais entre a comunidade con actividades en todas as etapas educativas. Na Infantil e Primaria realizarase con actividades e biblioteca e na ESO favorecerase a inclinación á tecnoloxía incidindo na percepción de utilidade a fin de favorecer a opción dos estudos STEM no Bacharelato, FP e na Universidade. “Será unha campaña moi de proximidade –informou a presidenta-, de poñer en valor a mulleres tecnólogas para que sexan referentes de nenas e mozas”.

Os criterios de selección das participantes incluirán estar empadroadas na provincia e ser tituladas en enxeñerías ou FP técnicas. Amais, valorarase o seu expediente académico e o coñecemento de idiomas, así como a experiencia previa. No caso da selección das empresas, estas deberán ter sede ou centro de traballo na provincia, e serán do sector do metal e as súas tecnoloxías (asociadas de Asime).