A comunidade galega, con 141.912 persoas desempregadas, acadou a cifra de paro máis baixa dos últimos 15 anos e a segunda de toda a serie histórica (que se computa desde 1996) para un mes de agosto. A directora xeral de Formación para o Emprego e Orientación, Zeltia Lado, valorou de xeito favorable que, a pesares do incremento do paro mensual respecto de xullo deste ano (+1,47%) -unha tendencia xeneralizada en todo o Estado- Galicia mantén á baixa o desemprego en todos os sectores, nas catro provincias e nos colectivos de prioridade nas políticas de emprego da Xunta respecto de hai un ano.

Galicia conta hoxe con 9.352 persoas sen emprego menos que en agosto de 2021. Tal e como resinou Lado, en todos os sectores de actividade anótase unha baixa nesta lectura interanual, en especial na industria onde o paro baixou o 13,61% -por 5º mes consecutivo- e na construción (-9,90%).  

Tamén os colectivos prioritarios nas políticas de emprego da Xunta experimentaron comportamentos favorables. Así, destacou a directora xeral, a comunidade conta cun 7% menos de parados menores de 30 anos que hai un ano e un 6,11% menos de mulleres desempregadas.

No caso das afiliacións, creceron un 1,53% na comunidade se as comparamos con agosto de 2021 ata acadar un total de 1.055.331 persoas.

Non en tanto, a directora xeral fixo un chamamento á prudencia e asegurou que a mellor política para enfrontar a actual conxuntura económica é a que contribúe a “xerar máis e mellor emprego, sen perder de vista a transición dixital e a transformación laboral nin, por suposto, as necesidades do noso mercado e das persoas traballadoras”, especificou. Nesta liña puxo en valor o compromiso do Goberno galego no apoio ao emprendemento, coa formación para o emprego e no fomento da conciliación e a conrresponsabilidade.

Para acadalo, relatou, “a Xunta conta coa estratexia Xempre, que permitirá á comunidade poñer en valor as capacidades das persoas, en conexión co tecido produtivo, coa colaboración público-privada como unha das claves”.

 

Indicou que colectivos prioritarios nas políticas de emprego da Xunta experimentan baixas no desemprego de ata o 7%, no caso dos menores de 30 anos, e de máis do 6% entre as mulleres

 

Lado detallou que o Goberno galego quere incidir no traballo coas capacidades das persoas e a colaboración público-privada. Por este motivo vense de elaborar unha Axenda Galega de Capacidades que permite coñecer que persoal precisa o tecido produtivo e poder preparalo coa mellor formación. Tamén se está a modernizar, tal e como dixo, o servizo de emprego de Galicia “que aproveitará a intelixencia artificial para optimizar os procesos de oferta e demanda de traballo”.

Lado lembrou que na actualidade, un dos obxectivos da Administración autonómica é o de conectar á cidadanía coa rede autonómica de emprendemento e a oferta laboral da comunidade e conta para elo coa nova Rede de Polos de Emprendemento e Apoio ao Emprego que iniciou xa a súa actividade desde Verín e Silleda.

Aposta pola conciliación e a corresponsabilidade
“A conciliación é clave para xerar emprego e consolidar proxectos”, engadiu durante a súa intervención a titular de Formación para o Emprego e Orientación, quen lembrou que soamente a Consellería de Promoción do Emprego e Igualdade está a destinar este ano 16 millóns de euros a fomentar, no eido do traballo, medidas para harmonizar a vida persoal e laboral.

A Xunta traballa para blindar un mercado laboral forte, que conte con todo o talento e potencial de Galicia: o das mulleres e homes, das persoas novas, de quen conta co ampla traxectoria... Por este motivo en 2022 puxéronse en marcha tres Plans Emprega cun orzamento próximo aos 128 millóns de euros para “favorecer a formación e a empregabilidade” de máis de 16-500 mulleres, 2.000 mozas e mozos e máis de 6.000 persoas con discapacidade ou en risco de exclusión social, rematou Lado.