O Parlamento de Galicia aprobou esta semana por unanimidade a proposición non de lei do Grupo Popular a través da que se solicita ao Goberno de España que avance, de xeito inequívoco, na modernización dos treitos ferroviarios Vigo-O Porriño e O Porriño-fronteira portuguesa, tanto no ámbito administrativo como orzamentario, empezando por incluír partidas con esta fin nas contas de 2023, que permita acompasar os tempos á planificación prevista polo Goberno de Portugal e que fixa en 2030 a chegada do AVE a Valença.

Así mesmo, pídese que inicie as negociación co Goberno portugués para subscribir o acordo entre os dous países que permita construír a necesaria nova ponte internacional ferroviaria.

A deputada popular Teresa Egerique lembrou que o Goberno galego “leva moito tempo requirindo ao Goberno central que estableza unha planificación completa de obras e de investimentos para desenvolver as actuacións e os orzamentos necesarios para acometer esta infraestrutura ferroviaria, principiando pola saída sur de Vigo”. “Neste sentido, tamén leva moito pedindo ao Goberno de España que defina o Plan Director do Corredor Atlántico e que aproveite a oportunidade única que supón a inclusión de Galicia no trazado do Corredor Atlántico Europeo e o acceso ao financiamento europeo para impulsar esta infraestrutura”, apuntou.

MULTIPLICAR A COMPETITIVIDADE

“A saída sur de Vigo permitiría multiplicar a competitividade do Porto de Vigo, fortalecería a Eurorrexión e posibilitaría acurtar o tempo de viaxe entre as cidades de Vigo e Porto en 22 minutos no lado galego”, indicou a deputada popular, quen engadiu que “sería un primeiro paso no obxectivo dunha conexión completa en alta velocidade entre estas cidades que reduza o percorrido desde as 2 horas e 20 minutos actuais a menos de 1 hora”.

Teresa Egerique incidiu que, “ademais do fluxo de persoas entre os dous territorios que captaría o tren de alta velocidade, a modernización das conexións ferroviarias farían posible converter a Galicia nun nodo internacional do transporte de mercadorías no noroeste peninsular, conectado con América e tamén con Portugal”.

Porén, Egerique lamentou que o “resultado decepcionante” do Cumio Ibérico celebrado o pasado 4 de novembro en Viana do Castelo, no que “o Presidente Pedro Sánchez deixou claro que avanzar nesta infraestrutura non é un asunto do seu interese nin prioritario na súa acción de goberno”. “O único que escoitamos foi un compromiso de palabra, pero nada de feitos ou realidades, quedando claro que, mentres para o Goberno portugués e para o Goberno de Galicia o AVE Vigo-Porto si é unha prioridade, non o considera así o Goberno de España”, indicou.

A deputada popular manifestou que “o único que temos agora é unha partida insignificante de menos de 30.000 euros no proxecto de orzamentos do Estado para 2023, sen compromisos plurianuais que permitan avanzar nunha infraestrutura estratéxica para Galicia e o norte de Portugal”.