A voceira socialista, Victoria Alonso, asegura que "durante a pasada semana, o Concello de Mos afirmou ter perfilados os seus orzamentos de cara o ano 2023. Previsións que deben trasladar aos partidos da oposición, para levalos a unha comisión e posteriormente ao pleno". Feito que "non se produciu" e que denuncian dende a bancada socialista.

"Nos pasados días, a prensa facíase eco dunha noticia do concello no que anunciaban ter os orzamentos e habelos entregado aos grupos da oposición, cousa que non se chegou a producir" xa que os socialistas afirman "non ter recibido tal información". O mesmo tempo que volven tachar este feito, como "outra mostra da facilidade que ten a actual alcaldesa para enganar e ocultar a verdade".

A voceira socialista, Victoria Alonso, incide no feito de que "terán que recibir a documentación no tempo que estipula a lei e repróchalle a alcaldesa que diga o que non é". Alonso afirma que "a falta de transparencia e información, é habitual na xestión do PP e que levan anos denunciando". Tamén aclara que non vai "permitir que se diga na prensa que xa recibiron a documentación cando, días despois das afirmacións, seguen sen tela".