Boa Vida entrogou onte varios xoguetes e lotes de roupa a case un centenar de familias da cidade. Todos eles entregados pola veciñanza de Pontevedra para a campaña de Nadal da asociación “Tódolos nenos cun sorriso” na que ainda están a participar corenta entidades de toda a cidade recollendo xoguetes, roupa e artigos de segunda man.

Ademáis Boa Vida tamén sorteou, entre todas as familias que tiñan vales para xoguetes e roupa, vinte osos de peluche feitos a man polas persoas presas na cadea de A Lama doados para a ocasión, e celebrou un tradicional "pincho" de Nadal.

O acto servíu, por outra banda, para que a entidade sen ánimo de lucro inaugurase a súa nova sede na rúa Echegaray, 10 para cursos e actividades na que estiveron presentes a deputada da Deputación de Pontevedra Olga María García Ballesteros; o director xeral de Inclusión Social da Xunta de Galicia, Arturo Parrado Puente; e o concelleiro de Benestar Social do Concello de Pontevedra, Marcos Rey e o alcalde de Pontevedra, Miguel Anxo Fernández Lores. 

García Ballesteros dixo que "todo o mundo necesitamos unha segunda oportunidade" exemplificando o labor de Boa Vida; Parrado Puente recoñeceu o "gran traballo de Boa Vida que levades facendo dez anos" e animou á asociación a seguir do mesmo xeito, comprometendose a continuar apoiando a asociación dende a Xunta pois, engadíu, a inserción laboral, polo tanto o acceso ó emprego que realiza a entidade pontevedresa "e a mellor ferramenta de inclusión, de feito o traballo dignifica as persoas". 

Rey puso en valor os proxectos do rural de Boa Vida: "son optimos para non esquecer as raíces". E Fernández Lores concluíu diciendo que "me gustaría que nestos momentos de crise todo o mundo tivera todos os dereitos posibles" e comprometeuse a "seguir colaborando dende o Concello con Boa Vida". 

A coordinadora xeral de Boa Vida, Pepa Vázquez e a coordinadora das súas tendas, Lourdes Bustamante agradeceron ás autoridades o seu apoio institucional á entidade, o que permite, recordaron, levar a cabo os distintos programas de integración social e laboral que Boa Vida desenvolve durante todo o ano. 

E sinalaron que a entrega dos xoguetes e roupa supón un acto de transparencia na xestión do labor da asociación. O que non sería posible, engaderon, sen a colaboración do voluntariado da asociación, os seus traballadores e traballadoras, e as aportacións de toda a veciñanza de Pontevedra. 

Vázquez subliñou que estes programas e servizos pasan pola formación, a inclusion en itinerarios de emprego e, a maiores incluso, a inclusion social para persoas que o precisen. 

Bustamante explicou, por exemplo que, dentro destos programas o traballo de recollida, preparación, clasificación, almacenaxe e venta de xoguetes, roupa e artigos doados ou a elaboración de prendas e complementos feitos con material reciclado, está feito por persoas en risco de exclusion social integradas nos itinerarios de Boa Vida.