Este domingo celebrouse unha asemblea extraordinaria da Comunidade de montes de Tameiga. Nun auditorio abarrotado, a veciñanza comuneira aprobou por unanimidade mercar os terreos particulares lindeiros ao monte comunal de Tameiga.

Os comuneiros, manteñen a súa negativa "a permutar monte comunal para o novo intento de Mouriño de apropiarse de monte veciñal, o proxecto 360 Sport Galicia". 

"Con esta gran operación de compra a Comunidade de Tameiga satisface a vella aspiración de ampliar a extensión do monte comunal", sinala Cesar Lago, presidente da Comunidade de Montes de Tameiga. 

A Comunidade destinará un mínimo de 200.000€ para ampliar a extensión do monte comunal de Tameiga. Os comuneiros ofrecen igualar o prezo por metro cadrado "que está ofrecendo Mouriño" e lanza unha "oferta de compra efectiva e inmediata, non unha opción de compra a dous anos vista como a que están realizando os promotores do complexo comercial e deportiva" sinalan nun comunicado emido hoxe.