O Partido Popular de Tui anunciou esta semana a incorporación da actual Presidenta do Liceo Casino de Tui, Lola Soto, que formará parte do equipo de traballo, así como tamén da lista electoral, que acompañará a Nico Montes nas próximas eleccións municipais que se celebrarán o próximo 28 de maio.

“Lola é unha muller cunha ampla formación ademáis deser unha traballadora incansable que dende que a coñecín cautivoume. Estou moi orgulloso de que se incorporase a este ilusionante proxecto co que pretendemos buscar un cambio para mellor da nosa cidade”, declarou o candidato Nico Montes.

Lola Soto, de 50 anos, é Licenciada en Bioloxía e Técnica Superior en Prevención de Riscos Laborais. É a responsable de prevención de riscos laboráis na multinacional Lear Corporation e, dende o 2019, é a Presidenta do Liceo Casino de Tui.

“Desde o primeiro momento que Nico me explicou en que consistía o seu proxecto non tiven dúbidas á hora de acompañalo neste desafío. Ambos buscamos o mellor para Tui e creo que eu tamén debía dar un paso adiante para lograr o cambio na nosa cidade que tantos tudenses queremos”, expresaba Lola Soto.