A plantilla da Policía Local de Tui ven de ser reforzada coa incorporación de cinco axentes que veñen de completar a súa formación dun ano na Academia Galega de Seguridade. Son catro homes e unha muller, sendo a primeira vez na historia que Tui conta cunha muller coma funcionaria da Policía Local.    

Esta semana foron recibidos na casa do concello polo alcalde, Enrique Cabaleiro, e polo concelleiro de Persoal e Seguridade, José Ramón Magán, que lles deron á benvida ao Concello de Tui.

O concelleiro de Seguridade, José Ramón Magán, destacou coma a incorporación destes axentes supón un incremento do 50% da plantilla da Policía Local o que dicía “permitirá prestar un mellor servizo á cidadanía e recuperar parcialmente a quenda de noite”.

Tamén hoxe foi recibido polo alcalde e polo concelleiro de Persoal o novo funcionario Ramón Nogueira González, que a semana pasada tomaba posesión coma funcionario de carreira no posto de auxiliar de arquivo e biblioteca municipal tras aprobar o proceso selectivo da Oferta de Emprego Público de 2019.