A nova exposición do Museo de Pontevedra mostra a obra de Cristóbal Gabarrón vinculada a Galicia. O artista pasa longas tempadas na súa casa-estudio de Bueu, na ría de Pontevedra, o que se pode ver a través do cento de pezas, entre pinturas, esculturas e instalacións, que conforman a mostra ‘Gabarrón atlántico. Ronsel de saudade’. A cultura e a paisaxe da costa atlántica son as protagonistas das creacións de Gabarrón, un artista versátil, experimental e con múltiples linguaxes. As pezas presentes na mostra son moi diversas formalmente, desde esculturas en aceiro e fibra de vidro policromada ata pinturas en óleos e pezas en cerámica. Gabarrón sitúa o individuo, a conciencia e os valores humanos como piares nos que se asenta a súa obra. A exposición permanecerá aberta no Edificio Castelao do Museo ata o próximo 14 de maio.