Un total de 1.017.641,25 euros é a inversión que suman os sete últimos proxectos en materia de saneamento a executar polo Consorcio de Augas do Louro. O Comité, integrado polos alcaldes dos catro concellos que o integran (Mos, O Porriño, Salceda de Caselas e Tui) e un representante de Augas de Galicia, vén de aprobar nos últimos días seis das actuacións e a outra farao previsiblemente na convocatoria do vindeiro luns.

No Concello do Porriño executaranse un total de seis obras que darán servizo a 81 vivendas de distintas parroquias. Así, en Rebouza (Atios) levarase a cabo a instalación de 700 metros de tubaxe que conectarán á rede de saneamento a unha ducia de casas, beneficiando a máis de 40 veciños, cuxa inversión é de 145.436,17 euros.

Por outra banda, acometeranse catro actuacións, dúas en Atios (Portela de Souto e en A Rocha-Covelo), una en Pontellas (Igrexa-Centeáns Arrotea) e outra en Torneiros (San Roque-A Areeira), nas cales a inversión chega aos 310.846,18 euros, que suporán a posta en funcionamento de máis dun quilómetro de canalización, dando servizo a 19 casas e preto de 70 usuarios. E a de maior magnitude en canto a inversión e beneficiarios será a que se realice na estrada de Mosende a Tui, en Madorras, onde se proxectan seis colectores cunha lonxitude de 1.100 metros e unha estación de bombeo, ademais esta actuación permitirá anular un canon de vertido non autorizado da CHMS e poñer en servizo outros 1.200 metros lineais de canalizacións existentes posibilitando así a conexión á rede de medio cento de vivendas, entre as que se atopa tamén a Escola de Mosende, e preto de 200 habitantes; a inversión neste caso é de 450.460,17 euros.

No Concello de Salceda de Caselas, en Santa María de Picoña, localízase a outra actuación. Dará servizo a 11 vivendas dos barrios de Arrotea-Ataúde. Consiste na instalación e posta en funcionamento de 491 metros de tubaxe, que beneficiará a uns 40 veciños e cuxo importe é de 110.898,73 euros.

“Trátase de darlle á veciñanza un servizo básico que lle corresponde, que neste caso levamos a cabo con fondos propios do Consorcio, que non debemos esquecer que dependen dos recursos que aporta cada municipio, co pago dos impostos dos seus cidadáns, pero que dende todos os concellos debemos impulsar e dar prioridade a actuacións como estas, con axuda tamén doutras entidades supramunicipais, para dar resposta a todas as demandas”, explica o presidente do Consorcio de Augas do Louro, Alejandro Lorenzo, á vez que lembra que “as inversións continuaranse nos vindeiros meses: máis proxectos, licitacións e recepcións de obras que irán completando e tecendo toda a rede de saneamento dos catro municipios para dar servizo á totalidade da veciñanza”.

As actuacións aquí anunciadas prevense que no mes de xuño poidan comezar a executarse os traballos, quedando rematadas todas ao longo deste ano 2023.