O Consorcio de Augas do Louro, que integra aos concellos de Mos, Porriño, Salceda de Caselas e Tui, está a executar as obras que permitirán unir a través dunha rede de telecomunicacións fixa mediante fibra óptica, o nó de comunicacións máis próximo localizado na PO-404 no lugar de A Pinza, coa súa sede central, situada na estación depuradora de augas residuais (ETAP) de Guillarei, en Tui.

A inversión ascende aproximadamente a 87.000 euros e consiste na instalación dun prisma de dúas tubaxes de polietileno corrugado de 160 milímetros de diámetro e 1.110 metros de lonxitude.

Deste xeito dotarase de ancho de banda suficiente para enlazar o sistema centralizado de telesupervisión e telecontrol por internet tanto da depuradora de Guillarei como das dúas estacións de tratamento de augas potables situadas en Mos e Tui e a máis de 100 instalacións electromecánicas situadas nos catro concellos que integran o Consorcio.

“A falta dunha infraestrutura de comunicación por fibra óptica na EDAR de Guillarei provoca limitacións na conectividade de datos, tanto para o funcionamento da telesupervisión de instalacións como para a operatividade das oficinas. Dotándose de fibra á EDAR de Guillarei mellórase así a conectividade do posto central co exterior”, explica Alejandro Lorenzo, presidente do Consorcio.