O candidato á alcaldía da Guarda polo BNG, no primeiro acto de campaña en Camposancos  brindou todo o seu apoio a veciñanza “para petar con decisión nas portas da Xunta de Galiza e conseguir  que a senda peonil Camposancos-A Guarda sexa unha realidade no menor tempo posíbel”.

Noutro  momento da súa intervención  e despois de abordar  distintas propostas   do programa do BNG dirixiuse a veciñanza coas seguintes palabras  “pídovos unha  oportunidade para desenvolver o  Monte Trega,  para convertelo dunha vez por todas na pedra angular da nosa identidade e reforzar o seu papel como elemento dinamizador da  nosa economía. “

Rematou a súa intervención manifestando  “A Guarda merece un goberno que escoite e que traballe da man da veciñanza como fai Merchi en Camposancos”.

Pola súa parte Merchi Martínez, Presidenta da ELM de Camposancos e candidata a reelección  polo BNG, despois de repasar o traballo feito neste mandato marcou como obxectivo fundamental continuar co proceso de mellora e modernización  da traida de augas e con  actuacións que contribuian ao aforro enerxético.

Tamén sinalou a limpeza de rúas, camiños, regos, fontes e lavadoiros como unha liña de traballo que hai que continuar así como a programación  cultural iniciada no anterior mandato.