Cheo total no centro sociocultural de Cela para escoitar á candidata socialista á Alcaldía de Mos, Victoria Alonso, “con xente do pobo e sen traer autobuses de fóra”. Un mitin no que presentou o seu proxecto para os próximos catro anos a partir de tres grandes eixes: a creación dun centro urbano en Mos a partir dun gran Consistorio con tódolos servizos na zona de As Pozas; a construción do túnel baixo a A-55 para dar paso á transformación da superficie nunha vía humanizada que vertebre as parroquias e, ademais, o impulso das comunidades enerxéticas para reducir o consumo municipal e reducir tamén a factura da luz á veciñanza.

En presencia de Carmela Silva, presidenta do PSdeG e da Deputación, e de David Regades, secretario xeral provincial do partido e delegado da Zona Franca, Victoria Alonso afirmou que todo o mundo en Mos está perplexo coa última “pirueta” do PP ao respecto do túnel baixo a A-55, “que agora, gracias a un Goberno socialista, avanza de verdade e vai supor un investimento de máis de 300 millóns de euros”. Así recordou as visitas electorais da ex-ministra Ana Pastor no ano 2015, “prometendo o túnel a bombo e platillo para logo deixar caducar o estudo de impacto ambiental; para incumprir como sempre”. “Agora o PP de Mos”, engadiu, “di que aposta pola liberación da peaxe da autopista AP-9 e para elo volve traer á mesma ministra que incumpriu as promesas do túnel e que ampliou as peaxes ata o ano 2048; vaia tomadura de pelo!”. “Prometeron o túnel 20 veces e agora non o queren! Por que? Quizais porque, unha vez máis, un Goberno socialista en Madrid vai facer o que eles non fixeron”.

Victoria Alonso recalcou que o PSOE está no mesmo sitio onde estaba e segue pensando que a autovía corta en dous a Mos e divide as parroquias, polo que “ túnel é a alternativa real, viable e executable para humanizar a superficie, reducir o tráfico radicalmente e convertela nunha vía que vertebre as parroquias en lugar de cortalas”. “Hai que ter un mínimo de coherencia”, subliñou, “porque vivimos nun concello rural e moi disperso” que obriga a planificar con sentido común.

A candidata comprometeuse a ser a alcaldesa de todos e todas e a seguir vivindo en Mos “porque agora temos unha que vive en Vigo e fai campaña na praza de abastos do Porriño”.

Carmela Silva afirmou que é tempo de cambiar a Alcaldía de Mos e puxo o exemplo dos 40 anos de gobernos do PP na Deputación, sen impulsar “nada transformador na provincia”. Engadiu que nunca tanta presencia tivo a Deputación en Mos como nestes últimos catro anos, aínda que a actual alcaldesa “é desagradecida, porque a Biblioteca reformouse con fondos moi maioritariamente da Deputación e logo pedíronlle uns euriños á Xunta. E a quen invitaron á inauguración? á Xunta! A nós, nin nos avisaron”. Animou, por tanto, a poñer fin a esta política malhumorada, de descortesía constante.

David Regades avogou tamén polo fin da confrontación estéril, “aos muros e ás barreiras con Vigo”. “En que beneficia á veciñanza de Mos esa hostilidade e os insultos ao alcalde de Vigo? En nada. Mos e Vigo temos intereses comúns”, concluíu. Recordou que a Zona Franca ten presencia en toda a provincia e non está en Mos. Engadiu que cómpre empezar a pensar en prestar servizos con acordos e convenios para racionalizar custos e mellorar a eficiencia. “Gañamos moito máis coa colaboración entre dous concellos irmáns, con tanta relación, que coa confrontación”, remachou.