O Consello da Xunta acordou hoxe manter a bonificación adicional do 50 % no transporte público autonómico ata xaneiro de 2024; dálle así o visto e prace á proposta de prorrogar, durante seis meses máis, os descontos que vén aplicando desde setembro de 2022. Dese xeito, a Xunta adopta o compromiso de seguir achegando o 20 % da bonificación total.

Esta bonificación do 50 % continuará a aplicarse no transporte interurbano de competencia autonómica, no autobús urbano de Pontevedra e de Ferrol –xa que os servizos se prestan con concesións da Xunta– e no transporte de ría entre Vigo e os concellos de Cangas e Moaña.

Ademais, este desconto seguirá a sumarse ás bonificacións que a Xunta ten activas no marco do Plan de transporte público de Galicia.

O Consello da Xunta avaliou tamén hoxe o balance da aplicación das bonificacións no transporte público autonómico desde a implantación do desconto adicional do 50 % no prezo do billete o mes de setembro do ano pasado.

A Xunta considera que, desde a posta en marcha en setembro de 2022 dese desconto adicional do 50 % e ata o pasado mes de maio, se bonificaron case 14 millóns de viaxes en transporte público, unha cifra que, previsiblemente, superará os 15,5 millóns de viaxes cando remate o mes de xuño.

Así, o balance dos nove meses desde a implantación da bonificación do 50 %, de setembro a maio, é que case o 78 % das viaxes en transporte público de competencia da Xunta recibiron descontos, grazas ao pagamento coas tarxetas de mobilidade de Galicia TMG e TMG Xente nova.

Ademais, as bonificacións activas impulsaron o uso do transporte público no conxunto de Galicia, que gañou un 28 % máis de viaxeiros entre setembro de 2022 e o pasado mes de maio fronte ao mesmo período do curso anterior. Esta recuperación da demanda aproxima o volume total de persoas usuarias ás cifras previas á pandemia da COVID-19, aínda que continúa un 13 % por debaixo.

En relación aos datos por provincias dos pasados nove meses, a da Coruña rexistrou o maior crecemento en número de viaxeiros, onde se desprazaron en transporte público preto de 2,4 millóns de usuarios máis que no mesmo período do curso anterior. Así e todo, os maiores incrementos porcentuais producíronse nas provincias de Lugo e Ourense, que rexistraron un crecemento do 38 % e do 33 %, respectivamente.

A aplicación das bonificacións activas no sistema de transporte público de Galicia supuxo un investimento público que superou os 23 millóns de euros de setembro de 2022 a maio. Do total, 21,3 millóns corresponden aos descontos por pagamento coas tarxetas TMG e TMG Xente Nova e 1,7 millóns de euros á aplicación da rebaixa nos bonos mensuais do autobús.

O Goberno galego anticipou durante este período cada 15 días as compensacións ás empresas concesionarias pola aplicación directa do desconto adicional do 50 % aos usuarios, aboando tanto os importes correspondentes á Comunidade Autónoma como as cantidades comprometidas polo Estado.

O conxunto das vantaxes tarifarias a que os usuarios acceden empregando as tarxetas de mobilidade de Galicia, especialmente desde a aplicación da bonificación adicional do 50 %, impulsaron o pagamento con estes dispositivos no autobús ata o 81 % do total das viaxes, fronte ao 55 % que supoñía o pagamento con tarxeta en agosto de 2022.

Segundo se desprende do informa avaliado hoxe polo Executivo autonómico, o desconto temporal nos prezos do transporte público acelerou tamén a emisión das tarxetas de mobilidade de Galicia, con máis de 51.000 novos dispositivos activados no último cuadrimestre de 2022 e unha media mensual de 10.600 novas tarxetas desde xaneiro de 2023, o dobre das que se viñan emitindo antes da entrada en vigor da bonificación adicional do 50 %.

Blindaxe do transporte público
O Goberno galego ten intensificado nos últimos anos a aposta polo transporte público, cuxos servizos están blindados cun investimento autonómico de máis de 90 M€ ao ano.

A Xunta, a través do Plan de transporte público de Galicia, está a lle ofrecer á cidadanía máis e mellores servizos e cunhas tarifas máis económicas e descontos que favorecen o seu uso.

No marco deste plan, as bonificacións establecidas pola Xunta a través do emprego da tarxeta de mobilidade de Galicia, TMG, dá dereito a diversos descontos, que son acumulables entre eles.

En primeiro lugar, efectuar o pagamento coa tarxeta TMG supón un 10 % de desconto sobre a tarifa en efectivo. Engádese, ademais, a bonificación por recorrencia, cun desconto do 25 % para o volume de viaxes comprendido entre 21 e 40 e realizadas no mesmo mes natural, e dun 50 % a partir das 40 viaxes.

Por outra parte, a tarxeta Xente nova permítelles aos menores de 21 anos viaxar de forma gratuíta no transporte público interurbano, competencia da Xunta de Galicia, incluíndo de forma adicional o transporte de ría en Vigo e o tren de ancho métrico en Ferrol.

De forma complementaria existen outros descontos promovidos pola Xunta, como o bono mensual, con orixe e destino en calquera concello dentro da mesma concesión. Este bono permite realizar ata 50 viaxes ao mes cun 50 % de desconto e un prezo mínimo de 50 € en traxectos de ida e/ou volta entre paraxes de orixe e destino do mesmo municipio.

Tamén está activo o bono mensual de uso ilimitado para algunhas concesións con tráficos cara ou desde algunha das localidades con hospitais cabeceira dos distritos sanitarios, cun desconto do 75 % sobre o importe do billete en efectivo correspondente a 44 viaxes e un prezo mínimo de 50 €.  

O cambio na forma de pagamento dos viaxeiros, co emprego maioritario das tarxetas, contribúe á próxima posta en marcha da Área de transporte de Galicia, que estenderá a toda a comunidade o sistema de descontos das áreas de transporte metropolitano, unha iniciativa que avanza na estratexia da Xunta de Galicia de fomento do uso do transporte público.