O programa “Bosques Terapéuticos”, co que a Deputación promove actividades baseadas na terapia oriental shinrin yoku (baño de bosque), continúa o seu percorrido por espazos naturais da provincia esta fin de semana con dúas novas rutas nos concellos de Cerdedo-Cotobade, Marín e Vilaboa que contan con todas as prazas esgotadas. O sábado 8 terá lugar unha ruta polo lago Castiñeiras e o domingo 9 de xullo pola carballeira de San Xusto, onde as 30 persoas participantes poderán desfrutar dunha actividade que mestura natureza, exercicio, cultura, historia e saúde a través dunha técnica orixinaria de Xapón que consiste no internamento na natureza para relaxar a mente e reducir o nivel de tensión. O obxectivo último é proporcionarlles ás persoas participantes unha experiencia cultural terapéutica e enriquecedora.

A ruta polo lago Castiñeiras (que transcorre polos concellos de Marín e Vilaboa) terá unha duración de 2 horas nas que se percorrerá unha distancia de 750 metros neste lago artificial situado no monte de Cotorredondo, que conforma un dos parques forestais máis antigos de Galicia, creado a partir dos anos 50 do pasado século polo enxeñeiro Rafael Areses. O parque conta cunhas 70 hectáreas de superficie repoboadas con castiñeiros, bidueiros, carballos americanos e outras especies exóticas. Ademais, no parque atópase un campo con catro mámoas, entre as que salienta a do Rei.

A carballeira de San Xusto (Cerdedo-Cotobade) é un lugar de encontro tradicional e, tamén, un referente de lendas e contos. Contén carballos centenarios, castiñeiros e carballos americanos e está presidida por un cruceiro e unha capela na que se celebra a romaría de San Xusto e San Pastor os días 5 e 6 de agosto. Antigamente nela celebrábase tamén o baile das espadas, e a mocidade da zona ía á caza de cabras bravas colgadas sobre os acantilados do val. Na procesión da romaría, ademais das imaxes dos santos, levábase o estandarte da Sociedade de Labregos de San Xurxo de Sacos, fundada en 1903. En xuño de 2007 inaugurouse unha estatua en lembranza da loita veciñal, ideada polo escultor Alfonso Vilar e rematada polo alumnado da Escola de Cantería da Deputación.

As dúas rutas, que comezarán ás 10:00 horas, parten da premisa de abrir os cinco sentidos, respirando a fondo e camiñando mentres se conecta coa natureza. As persoas asistentes son instadas a desconectar os dispositivos móbiles, observar a luz solar que penetra entre as follas, percibir os sons e aromas que as rodean, camiñar en silencio e en calma, e deixarse levar sentíndose parte da experiencia.

Quen queira ser partícipe da experiencia de “Bosques Terapéuticos” terá que agardar ata o luns 17 de xullo para inscribirse nas quendas de agosto, xa que todas as rutas de xullo esgotaron a totalidade das prazas ofertadas. Neste mes os percorridos continúan o sábado 15 no río Eifonso, o domingo 16 na fervenza do río Toxa (que tamén será o escenario da última quenda do mes, o domingo 30), o sábado 22 na illa de Tambo, o domingo 23 na Ruta da Pedra e da Auga e o sábado 29 na ponte colgante do río Lérez.