A alcaldesa de Mos, Nidia Arévalo, e representantes da Comunidade de Propietarios de San Antoíño xunto coa súa Administradora reuníronse co Consorcio de Augas do Louro esta semana  no Concello de Mos para tratar sobre a xestión da solución definitiva ao servizo de saneamento na urbanización da parroquia de Louredo.

Durante a reunión, que tivo lugar no salón de sesións, estiveron presentes tamén o tenente de alcaldesa e concelleiro de Obra Pública, Camilo Grandal, o xerente do Consorcio de Augas do Louro, Rufino Rodríguez, e o técnico de administración xeral do Concello de Mos, Víctor Rodríguez. O obxectivo principal do encontro foi abordar o proxecto da rede de saneamento da urbanización e a recepción das obras.

Segundo fontes do Concello, antes de que as obras sexan recepcionadas, os veciños deberán subsanar as deficiencias detectadas. Neste sentido, a administración local mosense mostrou a súa vontade de mediar e colaborar coa Comunidade de Propietarios de San Antoíño para resolver os problemas que afectan á urbanización.

"A alcaldesa de Mos, Nidia Arévalo, sempre estivo disposta a colaborar coa Comunidade de Propietarios de San Antoíño. O noso Concello non lles vai dar as costas nin deixalos sós", afirmaron fontes do Concello. A administración municipal busca actuar como mediadora para alcanzar unha solución á recepción das obras da urbanización.

É importante recordar que o Consorcio de Augas do Louro aprobou un crédito extraordinario no inicio deste ano para investir na eliminación de verteduras en áreas sen rede de saneamento en Mos. Esta actuación inclúe a contorna da urbanización San Antoíño, así como varios núcleos das parroquias de Cela e Sanguiñeda. A contratación do proxecto da parte exterior do saneamento de San Antoíño é responsabilidade de Augas de Galicia, mentres que a execución está a cargo do Consorcio de Augas do Louro.

O Concello de Mos desempeña un papel mediador neste proceso entre a Comunidade de Propietarios e o Consorcio de Augas do Louro co obxectivo de atopar unha solución para a conexión á rede de saneamento das vivendas na Urbanización de San Antoíño. O seu obxectivo final é alcanzar unha solución definitiva para o servizo de saneamento en San Antoíño.

Na reunión de traballo celebrada esta semana en Mos, estableceronse as directrices a seguir neste proceso no que tanto o Consorcio como os propietarios están implicados, coa administración local de Mos a actuar como mediadora para axudar a que a instalación final da rede de saneamento en San Antoíño sexa unha realidade no menor tempo posible.