O equipo de investigadores, liderado polos arqueólogos Eduardo Méndez-Quintas e Manuel Santonja da Universidade de Vigo e do Centro Nacional de Investigación sobre a Evolución Humana (CENIEH), retoma nestes días os traballos de investigación nas Gándaras de Budiño, o xacemento paleolítico máis destacado e antigo de Galicia. Esta sería a terceira intervención na zona, sendo a primeira dende que se determinou que os niveis máis antigos do xacemento datan de máis de 310.000 anos, confirmando que os primeiros habitantes de Galicia viviron en Porriño.

Os traballos, financiados polo Concello do Porriño, consistiron na última campaña nunha escavación dunha área de 30 metros cadrados, complementando as sondaxes arqueolóxicas realizadas en 2018, que proporcionaron información valiosa sobre as condicións de formación dos depósitos xeolóxicos e, sobre todo, sobre as densas acumulacións de ferramentas líticas atopadas no lugar. Este xacemento converteuse nun referente para Galicia desde o seu descubrimento en 1961 por Emiliano Aguirre, recoñecido arqueólogo e impulsor do proxecto de Atapuerca.

Nese momento, erroneamente determinouse que tiña unha antigüidade de arredor de 26.000 anos, o que levou a concluír que existía un paleolítico desfasado e tardío no noroeste da Península Ibérica, en contraste co que acontecía no resto do suroeste europeo, reforzando a idea equivocada do atraso secular de Galicia.

Nesta pequena área, foron recuperados ata o momento 1623 artefactos líticos, destacando numerosos exemplos de bifaces e outras pezas características do tipo acheulense.

O alcalde, Alejandro Lorenzo, acompañado polo concelleiro Marcos Martínez, visitou esta semana o xacemento para interesarse polo desenvolvemento dos traballos e destacou o "valor cultural e patrimonial" que estes teñen para O Porriño, xa que axudan a escribir a nosa historia e tamén, en gran medida, a do resto do mundo. O rexedor subliñou que o Concello estará sempre disposto a apoiar a investigación e a posta en valor deste tesouro que a nosa terra gardou durante séculos.

Os traballos desta terceira fase concluirán este venres e, en colaboración co Concello do Porriño, os nenos e nenas do campamento municipal participarán nunha visita guiada para coñecelos. Ademais, tamén haberá unha xornada de portas abertas, na que todos aqueles que desexen coñecer de primeira man a escavación poderán facelo, acompañados polos arqueólogos que dirixen o estudo.