O novo Plan de prevención e defensa contra os incendios forestais de Galicia (Pladiga) 2023, ten como obxectivo principal  reducir ao máximo posible as consecuencias ecolóxicas, económicas e sociais dos incendios forestais, tendo en conta os recursos dispoñibles.

O Pladiga 2023 mantén os catro ámbitos diferentes de planificación: prevención; detección, disuasión, investigación e medidas correctoras; extinción e formación; pero introduce algunhas novidades. Entre elas, destaca a creación dunha unidade especializada de directores de extinción para grandes incendios forestais, a incorporación de tres novas brigadas públicas helitransportadas, a ampliación da rede de videovixilancia forestal, a introdución de novas melloras tecnolóxicas, a actualización das áreas de alta actividade incendiaria e o reforzo do Plan de formación.

Novas brigadas helitransportadas públicas
No marco do Pladiga 2023, estableceuse unha unidade de directores de extinción que poderá ser mobilizada polo Centro de Coordinación Central de Incendios en casos de lumes con alto potencial de converterse en grandes incendios forestais. A súa función é facilitar e asegurar o correcto desenvolvemento das tarefas de extinción. Esta unidade estará formada por persoal de diferentes categorías (técnicos, axentes, bombeiros forestais,

emisoristas...) que dependerán directamente da Dirección Xeral de Defensa do Monte. Inicialmente, contará cun equipo mínimo de dous membros, sendo polo menos un deles capaz de asumir o rol de director de extinción ao chegar ao lume. A composición da unidade dependerá das características e potencialidade do incendio, sen haber límite de persoal e categoría en función das necesidades e dispoñibilidade de recursos. Ademais, proporcionaranse os medios materiais necesarios para o bo funcionamento deste equipo.

Neste sentido, este ano crearanse tres novas brigadas públicas helitransportadas nas bases do Barco de Valdeorras, no Xurés (Muíños) e en Queimadelos (Mondariz), cada unha delas con medio cento de efectivos para cubrir as diferentes quendas. Estas brigadas sumaranse ás que xa existen nas bases de Marroxo (Monforte), Campiño (Pontevedra) e Vilamaior (Verín). As brigadas helitransportadas serán un apoio fundamental para a unidade, xa que disporán de medios durante todo o ano e o seu persoal formará parte do equipo, ademais de contar coa versatilidade que proporciona o transporte aéreo para certas accións.

Por outro lado, como reforzo dos medios materiais que tamén axudarán o traballo desta unidade, está prevista a compra de 15 motobombas e 12 batracios, que son tractores con cisterna, trituradora multifunción e bulldozer. Tamén se poderán adquirir tres vehículos motobombas e dous batracios adicionais este ano. Estes últimos tamén xogan un papel importante na extinción, ademais de realizar labores preventivas.

Reforzo na vixilancia e avances tecnolóxicos
O Pladiga 2023 presenta tamén novidades en canto á vixilancia fixa. Neste sentido, a rede de cámaras incrementa en cinco unidades, situándose nun total de 153 cámaras distribuídas en 76 localizacións. Estas cámaras están equipadas con tecnoloxía de última xeración, especialmente deseñada para uso exterior e vixilancia forestal, coa capacidade de zoom remoto, movemento horizontal e vertical, rotación automática de 360º e gravación de alta calidade.

No ámbito tecnolóxico, incorporáronse melloras e novas aplicacións co obxectivo de facilitar o traballo dos equipos de loita contra incendios. Neste sentido, adquiriranse novos terminais de alto rendemento e gran capacidade de procesamento para distribuír a última versión de XeoCode Lite entre todos os técnicos forestais, axentes ambientais e persoal do Servizo de prevención e extinción de incendios. O XeoCode Lite é unha ferramenta que permite a información e rexistro de datos relacionados co punto de inicio e avance do lume, fotografías xeorreferenciadas, perímetro e outros datos relevantes.

Ademais, lanzarase unha nova aplicación web que facilitará a xestión, supervisión e control dos equipos de maquinaria pesada, tanto propia como contratada. Tamén se actualizarán as plantillas dos portafonos e móbiles Tetra, incorporando canais de intercomunicación con outros dispositivos que usen este sistema, como o 061, a policía, o 112 e os bombeiros urbanos, nas emisoras dos técnicos forestais e axentes ambientais, co fin de mellorar a coordinación durante os incendios.

Ampliación das áreas de alto risco
No novo Pladiga 2023, o número de áreas de alto risco aumenta de 35 a 40 parroquias. En total, 26 parroquias mantéñense respecto á campaña anterior, 14 engádense á lista e 10 deixan de figurar nela. Entre as novas incorporacións, temos Ribasieira (Porto do Son), Quins (Melón), Padrenda (Padrenda), Casaio (Carballeda de Valdeorras), A Xironda (Cualedro), Chaguazoso (A Mezquita), Oímbra e A Granxa (Oímbra), Grixoa (Viana do Bolo), Vilamaior da Boullosa (Baltar), Prado de Limia (Muíños), Mourentán (Arbo), San Salvador de Budiño (O Porriño) e Saiar (Caldas de Reis). Por outro lado, saen da lista as parroquias do Pindo (Carnota), Ourense (Ourense), Paradela (Manzaneda), San Millao (Cualedro), A Esculqueira (A Mezquita), A Fraga (Lobeira), San Paio de Araúxo e Río Caldo (Lobios), Guillamil (Rairiz de Veiga) e Rebordechau (Vilar de Barrio).

En canto aos recursos humanos e materiais mobilizados, en xeral, manteranse en valores semellantes ás últimas campañas. O operativo estará composto por máis de 7.000 persoas, incluíndo tanto o persoal propio da Xunta como o adscrito a outras administracións. Cabe destacar que os traballadores contratados durante nove meses pasarán agora a traballar durante os doce meses do ano. No que sé refire á maquinaria, manterase o despregamento de preto de 380 vehículos motobomba e mobilizaranse arredor de 30 medios aéreos, tanto da Xunta como do Estado, cifras similares ás das últimas tempadas de alto risco.

Formación e prevención
Mantense en vigor o Plan de formación aprobado en 2021 para o período 2021-2024, cun obxectivo principal de planificar a formación do persoal que integra o dispositivo de prevención e defensa contra os incendios forestais da Xunta, adaptándose ás necesidades operativas do servizo e ás diferentes categorías profesionais que o compoñen.

O orzamento previsto para financiar o Plan de formación do servizo no ano 2023 é de 700.000 euros, en comparación cos 400.000 euros do ano 2022. O plan consta de catro programas, dous deles dirixidos ao servizo, o terceiro enfocado no persoal dos concellos involucrado na extinción e o cuarto para a sociedade rural.
No ámbito da formación do servizo, está previsto impartir 33 cursos en 602 edicións durante o ano 2023, cunha oferta de aproximadamente 13.444 prazas. Estas accións formativas sumarán un total de 443.373 horas, en modalidades presencial, telemática ou mixta.