Un grupo da Associazione Mulino Sambuy de Turín, Italia, chegaba este sábado á Praza Arquitecto Antonio Palacios do Porriño logo de iniciar en Tui o Camiño Portugués a Santiago.

Foron recibidos polo alcalde Alejandro Lorenzo e concelleiros do equipo de goberno que os felicitaron pola iniciativa e os agasallaron con catro bolas de Pan do Porriño, desexándolles un bo Camiño.

A previsión é realizar a ruta xacobea en seis etapas, unha por día, dende onte ata o vindeiro xoves 31. O Porriño foi  a fin da primeira, onde quedaron a xantar e a pasar a noite para este domingo continuar a andaina.

A actividade enmárcase na iniciativa CamminAutismo e no percorrido van acompañados por axentes da Garda Civil que lles presta apoio para desenvolvemento da mesma ao abeiro do proxecto Camiñando xuntos polo autismo no Camiño de Santiago.