O grupo municipal do PP de Tomiño vén de esixirlle ao goberno local que cubra de inmediato a praza de tesoureiro municipal con motivo da xubilación do seu titular, xa que advirte que esta vacante pode ocasionar importantes retrasos nos pagos a provedores, moitos dos cales son, ademais, empresas do propio municipio.

A voceira municipal, Lara Meneses, cre imprescindible que o Concello conte canto antes cun profesional habilitado nestas funcións, “xa que a falla de sinatura autorizada para a realización dos pagos sempre causa trastornos no abono das facturas e as decenas de pemes que traballan para a administración local non teñen que sufrir estas consecuencias, ao que hai que engadir outro grave problema para o funcionamento municipal xa que o tesoureiro tamén se encargaba da contabilidade”.

“Cremos que é fundamental que o Concello, nunha sociedade dixitalizada como a actual na que os procesos de pago non son coma antano, afronte rápido as obrigas económicas que adquire con provedores e pemes, porque para estas empresas e negocios é moi importante cobrar canto antes as facturas tanto polo actual contexto de inflación como para evitar tensións internas na súa tesourería”, manifestou Meneses.

A concelleira popular revelou que o pago a provedores do Concello de Tomiño pechouse o pasado 2022 a unha media de 13 días desde a conformación da factura no seo dos servizos municipais, pero incrementouse por riba dos 19 días á conclusión do primeiro trimestre do presente 2023.

“Aínda non coñecemos os datos do segundo trimestre correspondentes co pasado mes de xuño, pero tememos que a xubilación do tesoureiro, que se vai producir este mesmo verán, provoque unha dilatación dos pagos que non se merecen as empresas que traballan para o Concello”, advertíu a edil do PP de Tomiño.

Ademais, a voceira popular quixo lembrarlle ao goberno local do BNG que é o único e exclusivo responsable do cadro de persoal municipal e lamentou que non soubera xestionar a prórroga do tesoureiro, que quería continuar malia a súa xubilación pero topouse coa negativa da alcaldesa, nin tampouco culminar con éxito a consecución de habilitados compartidos con outros concellos nas negociacións que emprenderon durante as últimas semanas.

“Polo momento solventáronse as vacacións do tesoureiro previas á xubilación cun tesoureiro accidental, pero non convenceron a outros profesionais nin aceptaron a solución ofertada pola Xunta para outorgarnos un interino, polo que descoñecemos a saída que van adoptar, e non nos parece axeitada a única posibilidade que lles queda, que pasa por funcionar con tesoureiros accidentais por períodos inferios a un mes”, detallou a concelleira, que agradeceu a colaboración do Goberno galego neste asunto fronte á pechazón do executivo local.

“Non sabemos se prefiren estar sen tesoureiro por motivos que non entendemos malia que pode ocasionar importantes retrasos nos pagos a provedores ou ben que non son capaces de atopar a alguén que queira traballar no Concello, algo que poderíamos chegar a entender porque debe ser difícil para un profesional aturar as actitudes de cortijo do goberno nacionalista de Tomiño, pero en calquera caso eles son os responsables e teñen que conseguir unha solución xa”, concluiu Meneses.