Onte aprobouse por unanimidade dos membros do Pleno do Concello de Mos, durante unha sesión extraordinaria convocada no salón de sesións da Casa Consistorial, a transferencia de créditos do orzamento municipal para destinalos a melloras deportivas. Así o informaron a alcaldesa de Mos, Nidia Arévalo, e a concelleira de Deportes, Feli Rodríguez, quenes apuntaron que se realizará un investimento de preto de 61.000 euros en melloras de dotacións deportivas, concretamente 60.825,92 euros; dos cales 48.325,92 euros destinaranse á reforma da cuberta do Pavillón de Sanguiñeda e 12.500 euros a adquisición de material deportivo.

Arévalo, rexedora local mosense, explicou que a actividade no Pavillón de Sanguiñeda quedará interrompida para poder levar a cabo a obra, que quedará rematada antes do 31 de decembro deste ano. A reforma da cuberta deste pavillón era moi necesaria e suporá unha importante mellora para os usuarios do mesmo, entre eles o alumnado e comunidade educativa do CEIP Mestre Valverde Mayo.

Os traballos a realizar solucionarán as humidades existentes mediante a actuación na cuberta exterior, con deterioro do seu estado de conservación dada a súa antigüidade.

En canto á adquisición de material deportivo, a edil de Deportes informou de que incluirá sendos marcadores para os campos de fútbol municipais das Baloutas e Cototorrón, así como elementos para exercizos para o ximnasio e a piscina do Pavillón Óscar Pereiro e para o propio Pavillón de Sanguiñeda.

Dos 48.325,92 euros que se investirán na cuberta de Sanguiñeda, 38.660,73 euros financiaranse graza a subvebción da Xunta de Galicia e o Concello asumirá os 9.665,19 euros restantes. Por outra banda dos 12.500 euros destinados a material deportivo, adquirirase con subvención autonómica material por importe de 10.000 euros e o Concello aportará 2.500 euros.