A alcaldesa de Mos, Nidia Arévalo, a concelleira de Educación, Julia Loureiro, e o presidente de Afaga Alzhéimer, Juan Carlos Rodríguez, participaron esta mañá nunha iniciativa promovida pola asociación na Escola Infantil a Galiña Azul de A Veigadaña con motivo do Día Mundial do Alzhéimer que mañá se conmemora. Unha actividade interxeracional baixo o título de “Contos da raposa xenerosa” na que confluíron literatura infantil, música tradicional galega e baile.

Trátase dun proxecto no que usuarios de Afaga e cativos da Escola Infantil comparten un tempo de encontro no que interactuar e compartir experiencias, na procura de que os nenos de idade infantil coñezan e descubran unha nova perspectiva de vida dende os ollos, verbas e experiencias dos máis maiores.

O desenvolvemento desta actividade busca a coparticipación no mesmo espazo de nenos de 2-3 anos cos maiores que acoden á Unidade de Atención a Persoas con Demencia de Afaga. A visión interxeneracional é a base do proxecto, onde os maiores narran varios contos infantís nas aulas da Escola Infantil. Desta maneira úsanse materiais significativos para os nenos pero coas habilidades e experiencias dos maiores.

Os obxectivos perseguidos son promover un encontro interxeneracional entre os máis pequenos e os máis maiores que elimine os estereotipos propios do edadismo actual. Crear espazos de participación entre nenos de 2-3 anos e maiores con demencia. Fomentar a integración das persoas con demencia no ámbito educativo. Eliminar barreiras físicas e psicolóxicas na percepción do proceso de envellecemento. Favorecer a creación de vínculos afectivos entre os máis pequenos e os maiores. Dotar de novas ferramentas de comunicación ós maiores cara unha relación menos verbal. Estimular as funcións cognitivas dos grupos participantes, con actividades de contido lingüístico, sensorial, motor e social. Desenvolver un axeitado estado emocional, xerando estratexias de autocoñecemento e xestión adecuado das propias emocións. Promover o coñecemento literario nos maiores das obras infantís actuáis e promover o coñecemento literario dos pequenos das obras tradicionais dirixidas ós nenos de épocas anteriores.

Tras a lectura de contos tradicionais e actuáis fíxose unha posta en común de emocións derivadas dos contos mediante a expresión musical e corporal.

A protagonista da historia, é a raposa Xenerosa. Escolleuse á raposa por ser unha especie típica da zona.

A lectura dos contos seleccionados foi activa e participativa cunha dinámica de presentación grupal de todos os participantes, usuarios e nenos, coa presencia sempre da figura da Raposa Xenerosa.