O Clúster Galego da Industria do Deporte e o Benestar celebra a posta en marcha do bono deportivo anunciado polo Presidente da Xunta de Galicia, Alfonso Rueda, que ofrece unha axuda de 120 euros para familias con nenos e nenas de entre 6 e 16 anos. Para esta entidade, esta medida representa un importante paso na promoción da actividade deportiva e dos hábitos de vida saudables na comunidade galega.

Dende a súa creación a principios de 2021, o Clúster Galego do Deporte ven traballando arduamente na necesidade de implementar medidas que incentiven a práctica da actividade física en todos os segmentos da poboación, especialmente naquelas áreas onde existe unha alta taxa de persoas inactivas. "Estamos contentos co anuncio do Presidente e esperamos que sexa o primeiro paso. É necesario continuar cunha política que fomente a actividade deportiva entre todas as persoas que, actualmente, son inactivas e vulnerables ante problemas de saúde", destaca Sofía Toro, xerente do Clúster.

A industria galega do deporte aplaude a medida como primeiro paso na promoción da actividade física.

A pesar de acoller favorablemente a medida do bono deportivo, Sofía Toro sinala que "sentimos falta de máis ambición" e solicita que a iniciativa se estenda a toda a poboación galega entre 6 e 16 anos. "É esencial chegar a todos aqueles nenos e nenas que actualmente non cumpren coas recomendacións da OMS de realizar 60 minutos diarios de actividade física, pois representan o 60% da poboación infantil. Cada neno e nena que deixemos de ser sedentario é un éxito para a sociedade galega", enfatiza.

É importante destacar que España, segundo a OMS, está entre os tres países europeos con máis casos de sobrepeso infantil, e aproximadamente o 40% da poboación infantil española presenta sobrepeso ou obesidade (Estudo ALADINO, Ministerio de Consumo).

Solicitan ampliar o bono deportivo a toda a mocidade para fomentar o deporte entre a poboación inactiva.

Sofía Toro tamén subliña que a axuda do bono deportivo, que permite a compra ou renovación de material e equipamento deportivo, asistir a clases ou anotarse nun centro deportivo, foi moi ben acollida pola industria galega do deporte. "Entendemos que terá un impacto significativo, beneficiando ás empresas do sector e facilitando o acceso ao deporte, que é un dos eixos prioritarios para o Clúster", afirma.

O Clúster Galego da Industria do Deporte e o Benestar confía en que a posta en marcha destas medidas políticas para fomentar a actividade física e os hábitos de vida saudables sexa o primeiro paso para situar este obxectivo no centro das políticas de configuración da sociedade galega do futuro.