A conselleira de Política Social e Xuventude, Fabiola Galicia, reiterou  a aposta do Executivo autonómico para que a mocidade galega conte con todas as facilidades para abrirse camiño en todos os ámbitos. Díxoo durante unha visita ás instalacións do Grupo Zendal, unha das compañías que participa no programa Xuventude Mentoring na Empresa, a través do que se impulsa o acceso ao emprego de 170 mozos con idades entre os 18 e os 30 anos.

Fabiola García destacou o interese que levantou esta primeira edición do Xuventude Mentoring na Empresa entre as compañías, as entidades locais e a xente nova. Así, o programa conta co apoio de máis de 70 entidades do sector privado nas que a mocidade realiza prácticas formativas; e tamén conseguiu a implicación dos concellos, xa que que nesta edición participan tres municipios da Costa da Morte: Camariñas, Muxía e Vimianzo.

Este programa supón un paso máis na formación e asesoramento á xuventude para facilitar a transición entre a etapa formativa e  laboral. Neste sentido, a Xunta impulsou en 2021 o Xuventude Mentoring, que este ano vai pola súa cuarta edición e que permitiu acompañar a preto de 500 mozos no seu paso de estudantes a profesionais.