O presidente da Deputación de Pontevedra, Luis López, solicita ao Concello de Vigo o proxecto da nova Grada de Gol de Balaídos para materializar o compromiso do goberno provincial coa remodelación do estadio. Nunha nova carta remitida este martes ao alcalde de Vigo, Abel Caballero, o dirixente reitera o seu “compromiso inequívoco” coa reforma e celebra compartir co goberno municipal vigués o desexo de rematala canto antes.

Na misiva, o máximo responsable da Deputación lamenta que a petición de fondos por parte da administración municipal para a nova Grada de Gol e a petición dunha reunión sobre os investimentos do ente provincial chegara sen a documentación e información necesaria sobre o proxecto. O único documento que chegou ao Pazo Provincial sobre a reforma da grada foi un resumo orzamentario dun so folio de extensión.

Neste sentido, Luis López explica ao rexedor vigués que, ao tratarse dunha iniciativa de tal envergadura, a Deputación precisa coñecer con todo detalle o proxecto completo para poder analizalo e avaliar co debido rigor o seu encaixe nos Orzamentos provinciais do 2024.

Por esta razón, o presidente da Deputación queda á espera da recepción do mencionado proxecto da Grada de Gol para, unha vez estudado, fixar en datas vindeiras un encontro co alcalde Abel Caballero no que se concreten os termos de colaboración nesta e noutras iniciativas.