O pasado sábado 11 de novembro tivo lugar a presentación das diferentes categorías que conformarán o equipo co que o Club Natación Ponteareas afrontará a tempada 2023-24.

O club mantén representación en todas as categorías federadas, desde os/as prebenxamíns ata o equipo máster, superando as 150 licenzas.

Recentemente, o equipo incorporou unha sección de natación inclusiva, baixo o selo de CN Ponteareas-Darlim, e conserva as súas sedes de adestramento nas piscinas do Complexo Universitario de Vigo e no complexo deportivo Álvaro Pino, en Ponteareas.

O presidente e director técnico da entidade do condado, Andrés Carrera, fixo un repaso dos diversos logros acadados na pasada campaña e marcou algúns obxectivos para a próxima. Entre eles, destaca a procura do ascenso do equipo absoluto á división de Honra galega e a participación do equipo feminino na Copa de España. Resaltou tamén a importancia do papel de cada equipo nas súas respectivas ligas e campionatos autonómicos, así como o desexo de manter a participación de nadadores e nadadoras do club do Tea en campionatos nacionais e internacionais, tanto en piscina como en augas abertas, unha disciplina na que o club acadou éxitos recentes.

Finalmente, lembrou algúns dos eventos que o club ponteareano organizou a tempada pasada, agradecendo o esforzo de persoas, institucións e patrocinadores para que sexan unha realidade cada ano. Sen revelar aínda que citas poderían celebrarse esta tempada en Ponteareas, Andrés deixou aberta a posibilidade de que tanto a piscina Álvaro Pino como o río Tea se convertan en sede de diferentes competicións.

O calendario autonómico xa comezou cunha novidade: o estreo na federación galega de natación dun novo presidente.