O Instituto mosense inaugurou un novo capítulo na súa historia ao lanzar o seu primeiro curso de Formación Profesional Básica en Servizos Comerciais. A especialidade foi elixida estratexicamente debido á elevada demanda laboral na zona.

A alcaldesa de Mos, Nidia Arévalo, xunto coa concelleira de Educación, Julia Loureiro, e a directora do Instituto, visitaron onte aos 14 mozos e mozas que forman a primeira promoción de Formación Profesional no Concello de Mos.

Este acontecemento marca un hito na historia municipal, pois nunca antes o IES de Mos impartira FP. A elección desta modalidade para o curso 2023-2024 recaeu na FP Básica de Servizos Comerciais (Comercio e Márketing), resultado dunha evaluación colaborativa entre dirección, profesorado, ANPA, Concello e AEMOS (Asociación de Empresarios de Mos), atendendo ás necesidades laborais identificadas na contorna.

Grazas á colaboración coa Consellería de Cultura, Educación, Formación Profesional e Universidades, o IES de Mos ofrece agora a FP Básica no centro, respondendo ás demandas educativas da comunidade.

Dende o inicio do curso escolar, o IES de Mos conta cun grupo de 14 alumnos/as matriculados na FP Básica de Servizos Comerciais. Estes estudos diríxense a quen non completou a ESO, proporcionando unha oportunidade motivadora con enfoques pedagóxicos adaptados ás características do alumnado, incluíndo orientación educativa e profesional.

Ao completar os dous anos de FP Básica, os estudantes obteñen o título de Técnico Básico e o Título de Graduación en Educación Secundaria Obrigatoria (ESO).

Na súa visita ao IES, a alcaldesa Nidia Arévalo animou os estudantes a esforzarse para acadar a titulación en Servizos Comerciais, subliñando que lles asegurará o título da ESO e motivándoos a continuar a súa formación despois de concluír a Formación Profesional Básica.