O programa VIDE en Futuro, dotado con 20.000 € para apoiar ao deporte individual de base, pechaba este martes o seu prazo de entrada de solicitudes. A Fundación Vigo en Deporte, grazas ao apoio do Concello de Vigo e dun grupo de empresas, contactou coas federacións deportivas galegas para facerlles chegar as bases e que estas alcanzaran ao maior número posible de deportistas Sub-23 polos seus resultados deportivos durante a campaña 22/23. Por outras edicións, hai constancia de que o último día se recibirán un importante número de peticións, que superan xa a trintena.

Unha vez pechadas as inscricións, VIDE estudará todas as solicitudes segundo o baremo establecido para que en decembro, como adoita ser habitual, o alcalde, Abel Caballero, e Manel Fernández, concelleiro de Deportes e vicepresidente executivo, poidan entregar as axudas económicas.

As becas de VIDE son incompatibles únicamente coas subvencións para deportistas individuais de elite que outorga a Concellería de Deportes para o mesmo fin e que están dotadas con 50.000 euros. Entre ambas actuacións, os deportistas vigueses de modalidades individuais reciben un total de 70.000 euros anuais.

Este apoio, no seu actual formato, comezou en 2014. VIDE xa entregou 180.000 euros (tamén durante a pandemia), que a final de ano sumarán 200.000 euros. As axudas aos Sub-23 oscilan entre os 400 e os 1.000 euros, para deportistas empadroados en Vigo desde o 1 de xaneiro de 2020 e nacidos desde o primeiro día de xaneiro de 1999.