Hoxe, véspera do 25N, ás 12h no Campo da Feira, a localidade de Mos reuníuse para denunciar e condenar a violencia de xénero nun emotivo acto que contou coa participación activa da veciñanza.

A alcaldesa de Mos, Nidia Arévalo, comezou o acto expresando o pesar polo recente suceso dunha muller asasinada no Porriño e condenou de maneira rotunda a violencia machista. "Mos e a súa veciñanza estamos consternados ante esta dura noticia", sinalou.

Durante o evento, permaneceu a carpa do CIM, Centro de Información á Muller de Mos, e ao longo da Avenida de Puxeiros, siluetas femininas exhibían os nomes das 52 vítimas deste ano en España. Asistencia e solidariedade materializáronse coa entrega de rosas de Mos, deixadas en cada silueta en recordo ás vítimas.

Martas Pereiro, Policía Local de Mos, foi a encargada de dar lectura ao manifesto conmemorativo ao rematar o percorrido, que contou coa participación de colectivos culturais, asociacións de veciños, centros educativos e AEMOS, a Asociación de Empresarios de Mos.

O Concello de Mos vistiu de morado a súa iluminación nocturna e instalou siluetas en edificios municipais, colexios e campos de fútbol, todas elas co lema "non somos siluetas, somos vítimas", unha afirmación que ecoa na campaña municipal do 25N deste ano.

Programación organizada polo Concello de Mos para conmemorar o 25N

O CIM de Mos, en conmemoración ao Día Internacional da eliminación da Violencia contra a muller, ofrece diversas actividades nun esforzo por concienciar á sociedade sobre esta dura realidade. Coa incidencia dos casos de violencia deste ano superando os do pasado, a prevención e sensibilización volven ser cruciais.

Entre as actividades destacan unha chala informativa sobre agresións sexuais e violencia sexual no IES de Mos, un acto de homenaxe en Puxeiros, unha charla para alumnado do IES a cargo de Noelia Míguez o 29 de novembro, e outra charla para familias de María Couso o 1 de decembro. Ademais, no mes de decembro, realizaranse obradoiros nos centros educativos. Un compromiso continuo na loita contra a violencia machista.