O presidente da Deputación de Pontevedra, Luis López, reuniuse onte luns no seu despacho do Pazo Provincial con Javier Abal, presidente da Asociación Provincial da Agrupación de Voluntarios de Protección Civil, e outros membros da xunta directiva, nun encontro no que o mandatario provincial coñeceu de primeira man o importante labor que presta este colectivo a diario, así como as necesidades que teñen.

O responsable do goberno provincial recoñeceu o mérito que teñen todas as voluntarias e voluntarios que colaboran co servizo de Protección Civil dedicando boa parte do seu tempo a axudar na xestión de emerxencias ou na organización de eventos culturais e deportivos que se celebran na provincia de Pontevedra.