O presidente da Deputación de Pontevedra, Luis López, e a deputada responsable da área de Turismo, Nava Castro, mantiveron un encontro de traballo co presidente do Instituto Galego do Viño, Xoán Cannas, para coñecer os proxectos nos que está a traballar esta entidade e explorar posibles vías de cooperación institucional.

A reunión forma parte da estratexia que a Deputación de Pontevedra está a desenvolver para potenciar o destino Rías Baixas, no que a aposta por combinar enoloxía, gastronomía e turismo xogará un papel fundamental na redacción do Plan Estratéxico de Turismo que o goberno provincial xa ten en marcha.