Abel Caballero anunciou  que a Xunta de Goberno aprobará este venres a adxudicación das obras para a rexeneración de Samil, abrangendo o tramo que vai desde a praia da Fonte ata a zona da pista de patinaxe. O goberno local investirá 1.800.000 euros nun proxecto conxunto co goberno de España, que contempla a recuperación da zona de praia e a creación dun novo paseo, cun importe total de 2.126.150 euros.

O alcalde cualificou como "importantísima" esta adxudicación da obra da Avenida de Samil, prevista para este venres pola Xunta de Goberno. Abel Caballero anunciou o inicio das obras a finais de xaneiro, cun investimento de case dous millóns de euros para a renovación e rexeneración de Samil.

A actuación na Fase I abrangerá 450 metros da Avenida, cun enfoque na accesibilidade: "Imos facer accesibles as zonas de aparcamentos en terra, con prazas en oblicuo de 4,6 metros de ancho e unha beirarrúa de 2,5 metros de ancho". A humanización inclúe medidas para o calmado do tráfico, como a nova rotonda, e con pasos de peóns resaltados. Haberá novas luminarias led, renovación de abastecemento e saneamento, nova sinalización e mobiliario urbano.

O Goberno de España será a administración encargada da recuperación da praia e o novo paseo no mesmo tramo para o que prevé un investimento de 2.126.000 euros. "Imos recuperar de forma extraordinaria a praia de Samil, con máis areal, máis paseo, máis aparcamento, máis humanización e mellores condicións", concluíu o rexedor.