Dende o Concello de Mos, a través da  alcaldesa Nidia Arévalo e o segundo tenente de alcaldesa e voceiro do grupo de goberno, Leo Costas, veñen de anunciar medidas fronte aos persistentes cortes eléctricos que afectan a diversas parroquias do concello debido á deficiente xestión de Unión Fenosa (UFD) nas obras de mellora da rede eléctrica.

Hoxe, Arévalo e Costas presentaron unha moción rexistrada para o vindeiro Pleno da Corporación Municipal, que terá lugar o día 26 deste mes. A moción ten como obxectivo abordar a problemática dos continuos fallos e cortes no subministro eléctrico, resultantes das obras de mellora levadas a cabo por UFD en diferentes puntos do concello de Mos.

Os representantes municipais sinalaron que os incidentes afectan gravemente á veciñanza de parroquias como Mos, Guizán, Torroso, Dornelas e Pereiras. Os veciños sufriron cortes reiterados no subministro eléctrico, así como incidencias periódicas derivadas das obras ou deficiencias na liña eléctrica, dificultando as súas actividades diarias e afectando a súa calidade de vida.

Como resposta á situación, o Concello de Mos pon á disposición dos afectados un servizo para notificar incidencias e presentar queixas relacionadas cos cortes eléctricos. Os afectados poden comunicarse a través do teléfono 986 09 70 37 ou enviar un correo electrónico a afectadosUFD@concellomos.es. Ademais, instan á veciñanza a reclamar directamente no departamento de Atención ao Cliente de UFD (900.333.999).

A problemática non só afecta a particulares, senón tamén a negocios que se ven obrigados a pechar as súas portas debido á falta de servizo eléctrico, causando danos materiais e perxuízos económicos. Empresas e particulares sofren dano en equipos electrónicos, pérdida de alimentos conxelados e outros danos colaterais.

A alcaldesa e o voceiro do grupo de goberno lamentaron a falta de resposta de UFD ás peticións realizadas pola concellería mosense de Eficiencia Enerxética. Denunciaron a insostible situación de cortes diarios sen solución aparente, urxindo a Unión Fenosa a resolver a problemática de inmediato.

A moción presentada busca esixir a UFD o restablecemento inmediato da normalidade no subministro eléctrico, así como a implementación de medidas e garantías para evitar futuros cortes durante as obras de mellora. Ademais, insta a UFD a facerse cargo dos desperfectos materiais en vivendas e empresas, así como das indemnizacións polas perdas nos comercios afectados polos cortes de subministro.

Con estas medidas, o Concello de Mos busca garantir o benestar da súa veciñanza e instar a Unión Fenosa a asumir as súas responsabilidades na mellora da rede eléctrica do concello.