A Xunta de Galicia publicou  a licitación das obras de construción de dous edificios para un total de 59 vivendas de promoción pública (VPP) en San Paio de Navia (Vigo). Os contratos a concurso, publicados na plataforma de contratos de Galicia, suman un orzamento base de licitación de algo máis de 11,5 millóns de euros IVE incluído.

As vivendas xeradas pasarán a engrosar o parque público da Xunta na cidade e as vivendas adxudicaranse en réxime de alugueiro entre as persoas inscritas no Rexistro único de demandantes de vivenda na cidade.

O primeiro dos contratos, destinado a levantar un conxunto edificatorio para 41 vivendas, 74 prazas de garaxe e 41 rochos, correspóndese coa parcela M-IVA-8 e conta cun orzamento de licitación de algo máis de 7,8 millóns de euros. O inmoble contará con dúas plantas de soto -para garaxes, rochos e locais de instalacións e servizos-, unha planta baixa -con catro portais, locais de instalacións e servizos e o acceso dos vehículos aos sotos-, tres plantas altas e o ático, os catro niveis nos que se repartirán as vivendas.

En canto ao reparto das vivendas, o edificio incluirá 20 de dous dormitorios -algunhas delas con terraza-, outras 20 con tres dormitorios -das que parte delas tamén terán terraza- e unha vivenda de catro dormitorios. Entre as 20 de tres dormitorios, haberá dúas especialmente adaptadas para persoas con mobilidade reducida.

A segunda das licitacións en San Paio de Navia ten como obxecto construír un inmoble de nova planta para dedicalo a 18 vivendas repartidas en tres bloques cun orzamento de licitación de algo máis de 3,6 millóns de euros. O edificio consta dunha planta de soto, planta baixa e dous andares máis. No soto estarán os garaxes, rochos e locais de instalacións e servizos; na planta baixa, haberá tres vivendas de dous dormitorios e, nos dous andares superiores, nove vivendas de tres dormitorios e seis de catro dormitorios.  

Esta promoción de vivendas en San Paio de Navia é unha das que o Executivo galego ten licitadas ou vai licitar proximamente co obxectivo de construír 201 novas vivendas de promoción pública en Vigo coa finalidade de destinalas a alugueiro social. A elas engádese a licitación, tamén publicada hoxe na plataforma de contratos de Galicia, das obras para a construción dun edificio en Valdecorvos que permitirá habilitar 74 VPP na cidade de Pontevedra, tras un investimento de arredor de 15 millóns de euros.