Os concelleiros socialistas, Vanesa Fernández e Rubén Pérez, xunto co Secretario Xeral, Delfín Domínguez, visitaron o Colexio Nosa Señora dos Remedios en Ponteareas para avaliar de primeira man as deficiencias e perigos asociados ao estado dos muros, que o colexio ven denunciando desde o comezo do curso escolar.

O Colexio Nosa Señora dos Remedios de Ponteareas alertou repetidamente sobre o mal estado dos muros que separan o centro das antigas casas dos mestres. Estes muros presentan un grave risco de derrubamento sobre o patio de recreo, poñendo en perigo a seguridade dos alumnos e alumnas. A pesar das continuas advertencias da dirección do centro e das familias, o concello limitouse a colocar vallas de obra e cintas plásticas, medidas que se consideran insuficientes e ineficaces.

Esta falta de acción por parte do concello reflicte un desinterese evidente pola educación pública e polo benestar dos nenos e nenas de Ponteareas. É inaceptable que se poña en risco a vida das persoas debido a cuestións económicas ou políticas. O concello ten a obriga de garantir condicións dignas e seguras para o desenvolvemento da actividade educativa, e non pode ignorar un problema tan grave.