O presidente da Deputación de Pontevedra, Luis López, xunto co deputado de Acción Comunitaria e Equipamentos Públicos, Javier Tourís, deu a coñecer este pasado sábado o Plan +Aqua, un programa destinado ás comunidades de augas da provincia dotado con un millón de euros, cuxas bases foron aprobadas o pasado mes de decembro. A presentación tivo lugar no Centro Cultural de Sobrada de Tomiño, onde López subliñou o "firme compromiso da institución coas comunidades de augas da provincia de Pontevedra".

Luis López destacou que este plan, que pon o foco na xeración de sinerxías positivas, especialmente no ámbito rural, enmárcase no novo modelo de xestión da Deputación de Pontevedra, centrado nas persoas, sostible e alineado cos obxectivos de afrontar o reto demográfico. "Tiñamos unha débeda coas comunidades de augas, que xogan un papel imprescindible nos espazos máis afectados pola desigualdade territorial", sinalou o presidente. Así, surxe +Aqua co obxectivo de "mellorar o medio rural e as barriadas urbanas mediante un aproveitamento máis eficiente dos recursos; vixiar a xestión da auga apoiando e reforzando a participación das comunidades locais; garantir o acceso universal e equitativo á auga potable, asegurando a súa calidade e sostibilidade; impulsar infraestruturas e equipamentos comunitarios que faciliten a autoxestión e a transformación social do territorio e, en definitiva, mellorar a calidade de vida dos nosos veciños, promovendo e dinamizando a implantación homoxénea de servizos comunitarios básicos".

As axudas do Plan +Aqua, cuxa convocatoria está aberta ata o 29 de febreiro, abranguen entre os 6.000 e os 10.000 euros por entidade. Con estes recursos, as comunidades poderán levar a cabo melloras, reformas ou reparacións nas súas infraestruturas e instalacións de auga comunitaria; desenvolver accións de dixitalización, sostibilidade e eficiencia enerxética que redunden nunha mellora na calidade da auga; optimizar os sistemas de tratamento; legalizar novas concesións ou renovar as xa existentes, así como mellorar as captacións e as infraestruturas de almacenamento de auga.

A aposta da Deputación de Pontevedra polo tecido asociativo tamén se reflicte no ano 2024 con dous millóns de euros, xa que, ademais do millón do Plan +Aqua, tamén se aprobou outra partida de igual cuantía para as entidades veciñais a través do Plan Provincia Comunitaria, que foi presentado aos colectivos provinciais esta mesma semana.