A portavoz nacional e candidata do Bloque Nacionalista Galego (BNG) á Presidencia da Xunta, Ana Pontón, comprometeuse este luns a volver negociar co Goberno do Estado o traspaso e o rescate das autoestradas AP-9 e AP-53, co obxectivo de rematar coas peaxes. Se os galegos e galegas lle dan a confianza para ser presidenta, Pontón propora nos cen primeiros días de goberno a creación dunha comisión bilateral entre Xunta e Estado para abordar a situación das autoestradas galegas e poñer fin ao "agravio e a discriminación" que sofre o País respecto ás peaxes.

A candidata do BNG asistirá á manifestación do domingo porque "non se pode tolerar o abandono á xente do mar dun goberno que nin está nin se lle espera". Acompañada dun condutor de camión, Pontón percorreu a autoestrada entre Sigüeiro e Lalín para coñecer de primeira man os efectos da carestía das peaxes no sector do transporte e denunciar o "sablazo" que sofren todos os galegos ao teren que pagar, especialmente na AP-9, por utilizar unha infraestrutura "requeteamortizada".

A candidata lembrou que actualmente só hai tres autoestradas no Estado coa concesión máxima permitida (75 anos), e dúas delas, a AP-9 e a AP-53, están en Galiza. Isto simboliza "ata que punto os galegos e as galegas sufrimos un agravio que nos penaliza na nosa mobilidade pero tamén no noso desenvolvemento económico", subliñou Pontón.