A Xunta Electoral tomou a decisión de que o Partido Popular retire a súa campaña publicitaria que atacaba a partidos da oposición e que fora denunciada polo Partido Socialista de Galicia.

Os carteis, colocados durante as festividades de Nadal, contiñan mensaxes como: "Se cres que a carta aos Reis dos nenos é demasiado longa, imaxina como será a de Puigdemont."; "Se na familia vos levades como PSOE, Sumar, Podemos, EU, BNG e Anova, recordade que nas festas non é obrigado falar de política"; e "Non merece nin carbón e pensa que lle imos entregar Galicia. Si, home, si", todos acompañados do lema “Teñamos Galicia en paz” e o logo do PP Galicia.

A Xunta Electoral sinalou que a colocación destes carteis, cos slogans e o logotipo do Partido Popular, viola as normas electorais. Na súa resolución, destacou que a mención explícita a diferentes formacións políticas evidencia a intención de captar votos para o PP, o que infrinxe as normativas.

A resolución subliña que non é necesario pedir expresamente o voto do elector para considerar unha actividade como propaganda electoral, sempre e cando busque persuadir ao elector a favor da formación anunciante e en contra doutras formacións políticas.

A Xunta Electoral, tras estimar parcialmente a denuncia, solicita ao Partido Popular que retire a publicidade denunciada da vía pública. Non se iniciará ningún expediente sancionador, pero a formación política foi instada a cumprir coa retirada da campaña.