Os primeiro e segundo tenentes de alcaldesa, Camilo Grandal e Leo Costas respectivamente, que á súa vez son concelleiros de Obra Pública, Grandal, e de Patrimonio, Contratación e Emerxencias, Costas; supervisaron esta mañá os traballos incluídos no ambicioso plan municipal de reparación dos desperfectos causados polas choivas e temporais.

Durante a visita a obras achegáronse ata o xa rematado muro de contención na parroquia de Cela, concretamente na Rúa Olegario Rodríguez, e ata o da subida á Cañoteira no barrio do Piñeiro, parroquia de Sanguiñeda; que quedará finalizado nos vindeiros días e antes de que remate a semana.

Neste senso os representantes municipais, Grandal e Costas, declararon que “as intensas choivas e os temporais dos últimos meses, levan causado un gran número de desperfectos en diferentes peches e viáis municipais do Concello de Mos, por isto desde a administración local demos inicio o pasado mes de xaneiro un ambicioso plan de reparación de todos estes desperfectos”.

O plan de reparacións comezou cos devanditos traballos na subida á Cañoteira, na parroquia de Sanguiñeda, grazas á colaboración da Deputación de Pontevedra, e na Rúa Olegario Rodríguez Pérez, en Cela, financiados con cargo a fondos propios do Concello de Mos.

A obra de muro de contención na subida á Cañoteira, no Piñeiro, parroquia de Sanguiñeda; trátase da construción dun novo muro de contención que soluciona os desperfectos causados na zona polas últimas inundacións. Para elo, foille concedida á administración local mosense unha axuda provincial do Servizo de Cooperación da Deputación de Pontevedra. O obxecto da subvención é o de reparación de danos causados polas inundacións. A concesión de subvención faise polo mesmo importe do gasto a realizar na obra: 50.751,32 euros. 

Por outra banda, tamén se atopan en marcha os traballos de limpeza e actuacións topográficas, para as reparacións na zona da Furna en Pereiras e no camiño da Quiringosta en Sanguiñeda, este último soamente pendente das xestións últimas da Confederación Hidrográfica Miño-Sil. Estas dúas actuacións poderán ser realizadas grazas á colaboración de Concello e Deputación Provincial con cargo ao Plan Máis Provincia.

A alcaldesa de Mos, Nidia Arévalo, afirmou sobre este plan que “deste xeito o Concello cumpre o compromiso de dar solución aos problemas causados polos temporáis en diferentes puntos de Mos, e de solventar a necesidade de reparacións puntuais dos desperfectos motivados polas últimas choivas e inundacións”.