“Vigo é unha cidade para maiores”, así o asegurou este mércores o presidente do PSdeG-PSOE local, Abel Caballero, durante o encontro con responsables de asociacións de maiores da cidade, ante quen incidiu na importancia de votar a José Ramón Gómez Besteiro para a presidencia da Xunta porque defenderá o modelo que desenvolve o goberno municipal de Vigo co que propicia a sociabilidade e axuda a afrontar as situacións de soidade.

“Besteiro vai atender todas as demandas de Vigo”, afirmou Caballero ao apuntar que na cidade conviven programas de axuda aos dependentes e a persoas que viven soas, como o dos Coidadores de Barrio ou a Teleasistencia gratuíta que dá apoio a 1.000 persoas, con iniciativas sociais como as viaxes en barco pola ría, as corais, ou os programas de envellecemento activo.

O líder dos socialistas vigueses afirmou que fronte ás iniciativas do goberno municipal de Vigo, a Xunta afronta a demanda de 4.000 novas prazas de residencias sen planificar unha soa nos seus 15 anos de gobernos de Alberto Núñez Feijóo e Alfonso Rueda para atender ás necesidades da cidade.

Caballero recordou que ante a oferta feita polo Concello á Xunta de terreos céntricos en Teis para construír unha residencia, a administración galega propón construír unha na ETEA. “É un disparate porque se atopa nun sitio illado”, afirmou ao asegurar que “non a van facer”.

O presidente dos socialistas de Vigo afirma que fronte ao modelo da Xunta, con residencias con deficiente atención aos seus usuarios, como a de Bembrive, o seu partido propón un modelo diametralmente distinto ao das macroresidencias para propiciar a convivencia e a dignidade dos maiores. Afirmou que o novo Plan Xeral de Ordenación Municipal contempla a reserva de solo para os novos proxectos. “Queremos un modelo distinto de centros de maiores, con espazos compartidos e con zonas de uso privado e a un prezo accesible”, recalcou.

Caballero pregúntase “Onde están?” os preto de 270 millóns de euros que lle corresponden á Xunta procedentes dos fondos do Goberno de España para dependencia e maiores. “Non os gastan e téñenos que devolver a Europa”, afirmou tras indicar a disposición do goberno de Vigo de investilos “inmediatamente” no momento en que se lles transfira a cantidade que lle corresponde á cidade.

O líder socialista puxo en valor a política de pensións de Pedro Sánchez, que axudou aos maiores vigueses co incremento nun 8,5 por cento das pensións en 2023, que se suman ao 3,8 por cento en 2024, ao 6,9% para as non contributivas e ao 14 por cento para as de viuvez. Acto seguido lembrou que o PP e Vox opuxéronse ao aumento das pensións.

Ademais salientou a importancia dos fondos dedicados ao Vigo Vertical que propicia a mobilidade dos maiores, como os 45.000 pensionistas que se trasladan de forma gratuíta co bus urbano na cidade e que serán máis por ser unha “gran prioridade” do seu goberno.