A Asociación de Veciños e Empresarios de Cabral (Aveeca) emitiu unha alerta ao Concello de Vigo sobre a acumulación de toneladas de xabre na zona do monte Cotogrande, en Cabral. Neste lugar atópase a parcela onde se desenvolve o programa Verdear da asociación de loita contra a droga Alborada.

Estes recheos veñen acontecendo dende tempo atrás, pero nas últimas semanas detectouse un notable incremento deles, sen que na área afectada se aprecie indicación algunha sobre a existencia de licenza para a súa execución.

Aveeca sospeita que se trata dunha nova actuación irregular relacionada coa Comunidade de Montes en Man Común Santa Mariña de Cabral, á que denunciou de xeito reiterado por actuar sen permisos e sen considerar criterios de seguridade, medioambientais ou urbanísticos.

No escrito dirixido ao Concello, Aveeca alerta de que estase modificando a rasante e o estado natural da zona afectada, e amosa preocupación polo feito de que xusto ao lado das verteduras hai unha torre de alta tensión, o que pode incrementar a perigosidade dos recheos.

A solicitude específica ao Concello é que, no caso de confirmarse a falta de licenza para os traballos, se tomen as medidas necesarias para paralizalos e devolver a contorna ao seu estado orixinal.