O Consello da Xunta deulle luz verde ao proxecto de trazado do treito da autovía Tui-A Guarda entre a estrada PO-350 e Estás, no concello de Tomiño, que suporá un investimento autonómico de máis de 78 M€.

Trátase dun novo tramo da autovía Tui-A Guarda, que avanza así polo concello de Tomiño, mellorando a mobilidade da comarca do Baixo Miño.

Este treito de novo trazado comezará no punto 3+790 da estrada PO-350 e rematará no punto quilométrico 59+860 da PO-552.

De xeito máis concreto, este novo tramo iniciarase nun enlace na PO-350, avanzará en dirección A Guarda, atravesará o val da Ponte en viaduto, chegará ao enlace da Ponte-Carregal, xirará á esquerda cara ao val do rego do Hospital e onde se atopa o terceiro dos enlaces que dá servizo ao Seixo.

Entre os puntos quilométricos 10+400 e 10+720 proxéctase o falso túnel de San Bieito, logo cruza o rego do Prego e conecta coa PO-552, no punto 59+860 mediante a glorieta de Estás.

No que se refire ás características técnicas, o proxecto contempla 4 enlaces para este tramo de autovía: o da PO-350, no punto 3+820 da vía de altas prestacións; o de Ponte-Carregal, no punto 6+580; o do Seixo, no 8+900; e unha glorieta en Estás na PO-552, no punto 11+960.

En relación ás estruturas previstas, proxéctanse 5 viadutos, do río Furnia, A Ponte, rego do Hospital, Tomiño e do rego do Pego; un falso túnel na zona de San Bieito, entre os puntos 10+400 e 10+720; 6 pasos superiores e 4 inferiores; e 3 muros de contención.

Na aprobación recóllense melloras significativas con respecto ao proxecto sometido a información pública, e tamén se incorporan as prescricións da declaración de impacto ambiental emitida en setembro de 2023. Realízanse modificacións para mellora da funcionalidade, para mellor accesibilidade de fincas e para reducir no posible afeccións.

Entre outras, deséñanse dous novos camiños de servizo, mellórase a permeabilidade transversal con dous novos pasos superiores e un paso inferior peonil, mellórase o enlace do Seixo para axudar a vertebrar a zona de dotacións deportivas e docentes e elimínase o semienlace da PO-344, pola forte afección que producía e a proximidade dos outros enlaces.

O Consello da Xunta, ademais de aprobar o novo proxecto, tamén deixou sen efecto o proxecto antigamente aprobado, liberando así a súa afección aos terreos da parte final do seu trazado no concello de Tomiño.

Agora mesmo están a piques de finalizar as obras de conexión entre os enlaces coa autovía A-55 e de Areas, que están en servizo, agás o ramal de entrada en sentido Portugal.

Ademais tamén se está a iniciar a redacción do proxecto do treito da autovía entre o enlace de Areas e a estrada PO-350, co obxectivo de prolongar a vía e duplicar o paso inferior de acceso ao polígono, de modo que dea funcionalidade a un enlace completo, tamén en sentido A Guarda.

Nas vindeiras semanas, ademais, prevese aprobar o proxecto de desdobramento da PO-552 entre Estás e Goián, para completar a autovía ata enlazar co treito 3, xa en servizo.