A alcaldesa de Mos, Nidia Arévalo, e o concelleiro de Servizos Públicos e Limpeza Viaria, Baldomero Lorenzo, celebran a resolución favorable de concesión de sendas subvencións do Plan +Provincia da Deputación de Pontevedra, mediante as que a administración provincial apoiará ao Concello con 272.000 euros para levar a cabo durante o presente ano o servizo de limpeza viaria e desbroce de cunetas.

As axudas corresponden á liña 2 do debandito plan, que destina 90.000,01 euros ao financiamento de “Servizo de desbroce, limpeza de cunetas e marxes de camiños municipais en Mos”. E á liña 3 que destina 182.003,28 € á contratación de 12 operarios, 8 dos cales serán peóns forestais adicados a labores de limpeza viaria e desbroce.

A liña 2 está destinada a financiar o gasto corrente da prestación dos servizos que se estimen necesarios para desenvolver prestacións e obras puntuais que non teñan a consideración de investimentos. A liña 3 está destinada á activación do emprego mediante a contratación de persoas desempregadas para realizar obras e servizos de interese xeral e social de competencia municipal e xestionados mediante a concesión de subvencións aos concellos da provincia de Pontevedra de menos de 50.000 habitantes.

A contratación de traballadores que o Concello de Mos realizará grazas á liña 3 do Plan +Provincia ascenderá a un total de 12 persoas: 8 peóns forestais, 3 peóns de construción e 1 oficial 2ª albanel a xornada completa durante 8 meses que suropán 185.763,32 € de orzamento total; dos cales 3.760,04 € serán de achega municipal e 182.003,28 € de subvención provincial.