Máis de 28.000 maiores de 65 anos viaxaron gratis no transporte público autonómico no mes de xaneiro, o que lles supuxo un aforro de case 300.000 € nos seus desprazamentos.  

O Consello da Xunta avaliou hoxe o Informe sobre o primeiro mes de funcionamento do transporte público gratuíto para maiores de 65 anos.

Esta iniciativa permitiu realizar no mes de xaneiro máis de 200.000 viaxes gratuítas no transporte público interurbano de competencia autonómica empregando a Tarxeta de Mobilidade de Galicia, a TMG.

A Xunta ampliou o pasado 1 de xaneiro a gratuidade no uso do transporte público aos maiores de 65 anos, unha gratuidade que xa viñan desfrutando os menores de 21 anos a través da tarxeta Xente Nova.

En relación ás viaxes realizadas polos maiores de 65 anos por provincias, a da Coruña é a que rexistrou un maior número de desprazamentos, máis de 125.000, e tamén de beneficiarios, máis de 16.000 maiores de 65 anos obtendo as vantaxes desta iniciativa, con bonificacións por importe de case 160.000 €.

Nas outras tres provincias, en Pontevedra, Ourense e Lugo, beneficiáronse da medida arredor de 9.000, 1.600 e 1.200 maiores de 65 anos, que realizaron preto de 60.000, 10.000 e 6.000 viaxes, cun aforro e 91.000, 19.500 e 19.400 euros, respectivamente.

Entre os concellos con maior número de usuarios e de viaxes realizadas no mes de xaneiro salienta Ferrol, onde o transporte urbano se presta a través das concesións de autobús da Xunta.

De xeito máis concreto, en Ferrol viaxaron de balde en xaneiro máis de 2.900 maiores de 65 anos, por riba dos 2.000 usuarios de Vigo, que é o segundo municipio por número de beneficiarios, e os case 1.500 da Coruña, que é o terceiro.

Na actualidade, arredor de 79.000 maiores de 65 anos contan con tarxeta TMG, polo que poden viaxar de balde. Cómpre lembrar que este dispositivo se pode adquirir nas oficinas de Abanca para comezar a viaxar gratis no autobús interurbano.

Esta medida permite realizar cada mes ata 60 viaxes gratuítas en toda a comunidade nas máis de 3.500 liñas de transporte interurbano da Xunta, no transporte da ría de Vigo, que conecta con Cangas e Moaña, e nos servizos do Feve na comarca de Ferrol.

O funcionamento desta iniciativa é similar ao da tarxeta Xente Nova, para os menores de 21 anos. O custo das viaxes aboadas coa tarxeta TMG reembólsase cada 15 días, cargando a bonificación nun caixeiro de Abanca.

Neste sentido, o importe das viaxes realizadas na 1ª quincena do mes reintégrase a partir do día 5 do mes seguinte; e o dos desprazamentos efectuados na 2ª quincena do mes, pódese recuperar a partir do día 20 do mes seguinte.

A través da páxina web www.bus.gal os usuarios poden ampliar información sobre a gratuidade do transporte público autonómico para maiores de 65 anos e as vantaxes que leva asociadas, ademais do listado das sucursais habilitadas para a expedición da tarxeta TMG e os servizos de transporte público nos que se aplica a gratuidade, cos correspondentes horarios e rutas.