Inicianse dous programas de andainas medioambientais, saudables e inclusivas, organizadas e promovidas polo Concello de Mos, sumando un total de 14 saídas. O 7 de abril terá lugar a primeira das Rutas Saudables coincidindo co Día Mundial da Saúde, e o 14 de abril darase inicio ao programa AndaMos, incluído no CoidaMos da concellería de Medio Ambiente mosense.

As concelleiras de Política Social e Medio Ambiente de Mos, Sara Cebreiro e Laura Méndez, respectivamente, anunciaron a celebración, durante o mes de abril, das primeiras andainas dos seus programas Rutas Saudables e AndaMos.

"As Rutas Saudables 'Andar é Saúde' comezarán coa saída conmemorativa do Día Mundial da Saúde, o 7 de abril, ás 10.30 horas desde o Multiusos das Pozas, facendo un percorrido de 5 quilómetros de lonxitude.

Este é un programa de 8 andainas saudables que aúna saúde e inclusión social, organizado en conxunto con EVD, sendo as usuarias do centro mosense as que guiarán as rutas. Cada andaina conmemorará un Día Internacional relacionado coa saúde e irá precedida dunha charla informativa sobre cada tema en concreto.

Este proxecto xurdiu a raíz dunha Mesa da Saúde organizada polo Concello de Mos e en base á demanda da poboación da contorna, da organización de andainas grupais. É unha oportunidade para aportar valor á comunidade, ao tempo que se favorece a socialización e a inclusión.

O programa AndaMos e ConectaMos coa Natureza iniciarase coa ruta pola parroquia de Mos o domingo 14 de abril e inclúe un total de 6 andainas. A do día 14 sairá da nave da Comunidade de Montes de Mos no Camiño Pedra Pinta en Santa Marta ás 9:30h e con chegada ao mesmo lugar. Neste caso a distancia a percorrer será de 6,45 quilómetros.

Aconséllase levar calzado cómodo e que agarre ben, ademais de levar un bastón de sendeirismo ou calquera bastón de apoio. A ruta está catalogada para todos os públicos. Poden levarse cans, apelando á responsabilidade dos propietarios, de que estes saben convivir e levarse ben con outros cans e persoas.

As rutas do plan AndaMos de andainas medioambientais son de dificultade moderada e asequibles a toda a poboación de diversas idades e condicións físicas, e nas que os camiñantes poden participar acompañados polas súas mascotas."