O PP de Tomiño reclama solución áxil para as perdas de auga na PO-344

O grupo municipal do PP de Tomiño interesouse na pasada sesión plenaria polos problemas das escorrentías de auga na estrada autonómica PO-344 –en dirección a Gondomar– entre Barro e Hospital, xa que están a causar importantes deficiencias na vía e problemas de seguridade viaria, e lamentou a proposta cursada ao respecto polo goberno local, xa que non serve como solución áxil a estes desperfectos, polo que vén de reclamarlle ao Concello que acometa o arranxo da tubaxe de abastecemento de auga neste punto e posteriormente faga as reclamacións económicas oportunas.

A voceira municipal, Lara Meneses, calificou de “ineficiente” a proposta do executivo nacionalista, xa que estima que a insistencia da solicitude de reparación ante o Consorcio Augas do Louro “non vai conseguir nada” despois de que esta entidade, á que o Concello considera responsable da canalización, desbotara reiteradamente o arranxo desta tubaxe tras peticións anteriores, xa que a competencia do mantemento é do Concello. E nesta liña, tampouco cre que se vaia acadar a necesaria mellora da vía a curto prazo coas outras accións ás que se abre o goberno local, en referencia a acudir á vía xudicial.

“Ante o noso interese por esta cuestión deunos a impresión de que o Bloque fixo unha das súas habituais estratexias de botar balóns fóra e tentar quedar ben, pero se esa importante avaría leva máis dun ano e o consorcio cre que non lle corresponde arranxala malia as solicitudes do Concello de Tomiño, agora non vai mudar de opinión de súpeto e, se falamos de recurrir á xustiza, estamos a resignarnos a anos de agarda por unha solución”, manifestou a concelleira popular.

Lara Meneses lembrou que o PP votou a prol da proposta do goberno local “porque nós sempre apostamos por traballar en positivo por Tomiño e porque todas as forzas políticas sumemos para o noso pobo”, pero tamén sostén que as  ineficaces accións do BNG neste caso “non van ser útiles para o máis importante para os veciños de Barro, Hospital e do resto do concello, que é o arranxo rápido para poder circular por esa vía con tranquilidade e seguridade”.

Por elo, a voceira municipal anunciou que os populares van insistir, posto que estima que a avaría non se vai arranxar nos próximos meses co novo intento do BNG, na súa iniciativa para que o Concello se encargue directamente da execución da obra como afectado subsidario, dado que esta canalización que subministra ao resto do Baixo Miño pasa polo termo municipal, e posteriormente esixa as posibles compensacións económicas que poidan ser oportunas.

“Á vista de que este conflito parece abocado a rematar na xustiza pola diverxencia de opinións sobre a asunción de responsabilidades, é moito máis eficiente facer a obra de inmediato e a continuación reclamar os cartos que acudir aos xulgados en primeira instancia e estar agardando durante anos por unha solución”, concluíu Meneses.