Os traballos de humanización das rúas Buenos Aires e Progreso rematarán neste mes de abril tras un investimento autonómico de case 1 millón de euros.

Así o avanzou onte o director da Axencia Galega de Infraestruturas, Francisco Menéndez, que, xunto coa delegada territorial da Xunta en Vigo, Ana Ortiz, e o tenente de alcalde do Porriño, Carlos Martínez, supervisou a marcha das obras na estrada PO-329 ao seu paso polo centro urbano, que acadan xa o 85% de execución.

Menéndez explicou que está a ultimar a reforma da vía autonómica ao seu paso polo centro urbano do municipio co obxectivo de transformar a estrada en rúa na que os coches cedan protagonismo aos peóns.

Así, para acadar rúas máis seguras, accesibles e humanas, habilitáronse beirarrúas máis amplas, reducindo para iso a anchura dos carrís de circulación co obxectivo de favorecer un tránsito máis cómodo e seguro para a veciñanza e primar os peóns fronte aos vehículos.

Ademais, reordenáronse as zonas de aparcadoiros, renováronse os pavimentos e mellorouse a iluminación coa instalación de 22 novos puntos e reforzos lumínicos nos pasos de peóns, para garantir unha maior seguridade.
Tal e como resaltou o director da Axencia Galega de Infraestruturas, no proxecto tívose en conta a petición do Concello do Porriño e do Consorcio de Augas do Louro, aproveitando os traballos para acometer tamén unha necesaria renovación e ampliación das redes de saneamento e abastecemento.

O tenente de alcalde, Carlos Martínez, puxo en valor a intervención “xa que non só acondiciona un dos principais accesos ao centro urbano, algo que era moi necesario pola gran afluencia de vehículos e peóns que rexistra a diario, senón que conecta esta zona co resto da vila, promovendo a súa dinamización”.   

A actuación abrangue un treito de case 700 metros da PO-329 e ten como obxectivo reforzar a seguridade dos peóns, ademais de mellorar a accesibilidade e o aspecto estético da vía, favorecendo a súa mellor integración na vida urbana do núcleo do Porriño.

Segundo as necesidades detectadas, dividiuse en diferentes ámbitos zona da rúa Buenos Aires, no treito que vai desde a glorieta coa PO-511 e a PO PO-331 ata o cruce co río Louro, pasando baixo a autovía A-55. Na zona máis próxima ao río, a prioridade era mellorar a seguridade peonil, colocando pasos elevados e adaptándonos á normativa de accesibilidade.

Nas proximidades da glorieta, acometeuse unha actuación máis ampla, coa reordenación da calzada para gañar espazo para os peóns, reducindo o dos carrís, ademais de dispoñer sitio para os cometedores e aparcadoiros, renovando e ampliando tamén as beirarrúas, a iluminación e a sinalización e dispoñendo mobiliario urbano.

Tras ese primeiro treito de actuación, os traballos avanzaron na rúa Progreso, entre o límite con Mos e o paso a nivel coa vía férrea, acometendo a reordenación da calzada e a humanización da vía.

Tras ese primeiro treito de actuación, os traballos avanzaron na rúa Progreso, entre o límite con Mos e o paso a nivel coa vía férrea, acometendo a reordenación da calzada e a humanización da vía.

O treito máis complezo, entre o paso a nivel e o acceso á empresa Frigolouro, deixouse para o final, traballando co maior coidado para minorar as molestias e as afeccións.

Nestes momentos as obras están xa a ultimarse, unha vez acometidos os firmes eos pavimentos, as beirarrúas, os accesos, reordenadas as bandas de aparcadoiro, renovados as redes de abastecemento e pluviais e instalado o novo alumeado.

Nas próximas semanas avanzaranse no seu remate, coa disposición de mobiliario urbano, xardinería e rego, e sinalización horizontal e vertical.