Xa non queda nada para o XXI Festival de Cans e o Concello do Porriño xa vai quentando motores. Co fin de promover o certame, dende a concellería de Cultura, que dirixe Bienvenido Estévez, lánzase unha nova edición da novela de Carlos Meixide, “Cans”, que ten como escenario o festival e a aldea que lle da nome.

Trátase da décimo cuarta edición da obra que levará outros cen exemplares ás librarías. Cabe destacar que dende que se publicara por primeira vez no ano 2016 vendéronse xa máis de 2000 exemplares.

Autoeditada e ilustrada por María Mejide, a novela conta a historia dun grupo de mozos, os cinco de Ons, que deciden rodar unha curta durante o Festival. Ao longo da historia aparecerán persoaxes que de seguro resultarán moi familiares aos/as lectores e a calquer asíduo ao certame: actores e actrices, xornalistas, cineastas e veciños/as da aldea. Todos eles formando parte dunha novela con moitos rasgos de humor propios do autor, pero tamén con partes de suspense e misterio.

O alcalde, Alejandro Lorenzo, recibiu hoxe ao autor na casa consistorial para presentar esta nova edición da novela. “É un luxo que alguén como Carlos Meixide contribúa á promoción do festival , de Cans e do Porriño a través da súa historia”, apuntou o rexedor, “Estou seguro que, igual que lles pasou aos cinco de Ons, todo aquel que veña ao Festival estou seguro que os atrapará”.